អតីតសមាជិកព្រឹទ្ធសភាអាមេរិក និងជាអនុប្រធានគណបក្សប្រជាធិបតេយ្យ លោក Joe Lieberman បានទទួលមរណភាពហើយ កាលពីថ្ងៃពុធ (២៧ មីនា) ក្នុងវ័យ ៨២ឆ្នាំ នៅទីក្រុងញូវយ៉ក បន្ទាប់ពីរងផលប៉ះពាល់ពីការដួល។ នេះបើតាមការឲ្យដឹងពីគ្រួសាររបស់សព។
សេចក្តីថ្លែងការណ៍បានឲ្យដឹងថា៖ «ភរិយាជាទីស្រឡាញ់របស់លោក គឺលោកស្រី Hadassah និងសមាជិកនៃគ្រួសាររបស់លោក នៅក្បែរលោក នៅពេលលោកបានទទួលមរណភាព។ សេចក្តីស្រឡាញ់របស់សមាជិកព្រឹទ្ធសភាលោក Lieberman ចំពោះព្រះជាម្ចាស់ គ្រួសាររបស់លោក និងប្រជាជនអាមេរិក នាំឲ្យលោកប្រឹងតស៊ូពេញមួយជីវិតរបស់លោក ក្នុងការបម្រើផលប្រយោជន៍សាធារណៈ»។
សូមរំលឹកថា លោក Lieberman គឺជាបេក្ខភាពអនុប្រធានាធិបតីរបស់គណបក្សប្រជាធិបតេយ្យ នៅក្នុងការបោះឆ្នោតឆ្នាំ២០០០ ដែលពេលនោះសមាជិករបស់គណបក្សសាធារណរដ្ឋ លោក George W. Bush មានជ័យជម្នះលើសមាជិករបស់គណបក្សប្រជាធិបតីលោក Al Gore។ លោកបានរងបរាជ័យក្នុងការប្រឹងប្រែងប្រជែងការតែងតាំងតំណែងប្រធានាធិបតីរបស់គណបក្សប្រជាធិបតេយ្យឆ្នាំ២០០៤ ដែលប៉ះពាល់ដោយសារការគាំទ្ររបស់លោក នៅក្នុងសង្គ្រាមអ៊ីរ៉ាក់៕