យោធារបស់ទីក្រុងគីវ បាននិយាយនៅថ្ងៃព្រហស្បតិ៍នេះថា កងកម្លាំងអ៊ុយក្រែន បានបាញ់ទម្លាក់យាន ដ្រូនចំនួន២៦គ្រឿង ក្នុងចំណោម ២៨គ្រឿង ដែលត្រូវបានបាញ់បង្ហោះនៅពេលយប់ដោយប្រទេសរុស្ស៊ី។
កងទ័ពអាកាស បានបន្ថែមថា យានដ្រូនដែលផលិតដោយអ៊ីរ៉ង់ ត្រូវបានបំផ្លាញលើផ្នែកខ្លះនៃភាគខាងកើត ភាគខាងត្បូង និងភាគអាគ្នេយ៍នៃប្រទេសអ៊ុយក្រែន។
អភិបាលនៃតំបន់ Zaporizhzhia បាននិយាយនៅលើបណ្តាញសង្គមTelegramថា ស្ត្រីពីរនាក់ បានរងរបួស នៅពេលដែលកម្ទេចកម្ទី បានធ្លាក់ទៅលើសង្កាត់លំនៅឋានមួយក្នុងរដ្ឋធានីក្នុងតំបន់នេះ។
រដ្ឋអាជ្ញានៅតំបន់ Kharkiv ភាគខាងកើត បាននិយាយថា ភោជនីយដ្ឋាន ហាងមួយ និងការិយាល័យជាច្រើន ត្រូវបានខូចខាតដោយសារបំណែករបស់យានដ្រូនចំនួនបីគ្រឿង។
កងកម្លាំងអាកាស បានបន្ថែមថា ការវាយប្រហារនៅពេលយប់របស់រុស្ស៊ី រួមមានមីស៊ីលជាច្រើនប្រភេទ។ ទីបញ្ជាការភាគខាងត្បូងរបស់យោធា បានរាយការណ៍នៅលើ Telegramថា មីស៊ីលទាំងនោះដែលបាញ់ចេញពីយន្តហោះនៅលើសមុទ្រខ្មៅ បាន «បាត់បង់សមត្ថភាពប្រយុទ្ធរបស់ពួកគេ»។
អភិបាលតំបន់ Odesa លោក Oleh Kiper បាននិយាយថា រុស្សី បានធ្វើការវាយប្រហារដោយមីស៊ីលដាច់ដោយឡែកមួយនៅពេលព្រឹក ប៉ុន្តែមិនមានការរាយការណ៍ពីអ្នករងរបួសនោះទេ។ លោកមិនបានបញ្ជាក់ពីគោលដៅទេ។
ប្រទេសរុស្ស៊ី បានចាប់ផ្តើមការវាយប្រហារតាមអាកាសជាទៀងទាត់ទៅលើតំបន់មានប្រជាជនរស់នៅ នៅឆ្ងាយពីខ្សែត្រៀមនៃការលុកលុយពេញរយៈពេលពីរឆ្នាំរបស់ខ្លួនលើអ៊ុយក្រែន។