នាយករដ្ឋមន្ត្រីហូឡង់ លោក Mark Rutte បាននិយាយថា លោកបានពិភាក្សាអំពីឧប្បត្តិហេតុនៃការធ្វើចារកម្មតាមអ៊ីនធឺណិត ដែលប្រទេសហូឡង់ បានស្តីបន្ទោសលើរដ្ឋចិន ក្នុងអំឡុងពេលពិភាក្សាជាមួយលោកប្រធានាធិបតី ស៊ី ជីនពីង( Xi Jinping) កាលពីថ្ងៃពុធ។
ទីភ្នាក់ងារចារកម្ម MIVD បាននិយាយកាលពីខែមុនថា ក្រុមចារបុរសតាមអ៊ីនធឺណិត ដែលគាំទ្រដោយរដ្ឋរបស់ចិន បានលួចចូលប្រើប្រាស់បណ្តាញយោធាហូឡង់កាលពីឆ្នាំមុន ដោយហៅវាថា ជាផ្នែកមួយនៃនិន្នាការនៃចារកម្មនយោបាយចិនប្រឆាំងនឹងហូឡង់ និងសម្ព័ន្ធមិត្តរបស់ខ្លួន។
នេះគឺជាលើកទី១ហើយដែលហូឡង់ បានចាត់ទុកជាសាធារណៈថា ជាចារកម្មតាមអ៊ីនធឺណិតចំពោះប្រទេសចិន ខណៈដែលភាពតានតឹងផ្នែកសន្តិសុខជាតិ កើនឡើងរវាងប្រទេសទាំងពីរ។ ពួកគេ ក៏ស្ថិតក្នុងការប្រឈមមុខដាក់គ្នាលើការរឹតបន្តឹងការនាំចេញបន្ទះអេឡិចត្រូនិកបច្ចេកវិទ្យាកម្រិតខ្ពស់ដែលផលិតដោយក្រុមហ៊ុនយក្សហូឡង់ ASML ទៅកាន់ប្រទេសចិន។
ទីក្រុងប៉េកាំងតែងតែបដិសេធការចោទប្រកាន់អំពីចារកម្មតាមអ៊ីនធឺណិត ហើយនិយាយថា ខ្លួនប្រឆាំងគ្រប់ទម្រង់នៃការវាយប្រហារតាមអ៊ីនធឺណិត។
មន្ត្រីសហរដ្ឋអាមេរិក និងអង់គ្លេសកាលពីថ្ងៃចន្ទ បានធ្វើការចោទប្រកាន់ការដាក់ទណ្ឌកម្ម និងចោទប្រកាន់ទីក្រុងប៉េកាំងពីយុទ្ធនាការចារកម្មតាមអ៊ីនធឺណិតយ៉ាងទូលំទូលាយ ដែលតាមការសង្ស័យបានធ្វើឲ្យប៉ះពាល់មនុស្សរាប់លាននាក់ រួមទាំងសមាជិកសភា ក្រុមអ្នកសិក្សាស្រាវជ្រាវ និងអ្នកសារព័ត៌មាន និងក្រុមហ៊ុន រួមទាំងអ្នកម៉ៅការការពារជាតិផងដែរ។