បាល់ទាត់៖ ក្រុមអង្គរថាយហ្គឺរនឹងបើកទ្វារផ្ទះទទួលក្រុមណាហ្គាវើលដ៏ នាវេលាម៉ោង ៣៖៣០នាទីរសៀលថ្ងៃទី២០ ខែកក្កដានេះក្នុងជំនួបបង្គ្រប់សប្ដាហ៍ទី៩ នៃលីគកំពូលកម្ពុជា។ ការប្រកួតនេះនឹងមានផ្សាយផ្ទាល់លើកញ្ចក់ទូរទស្សន៍ BTV-News។
ជុំវិញការប្រកួតនេះ លោក មាស ចាន់ណា គ្រូបង្វឹកក្រុមណាហ្គាវើលដ៏បានចាត់ទុកជាការប្រកួតដ៏តានតឹងមួយ ហើយលោក៏មិនហ៊ានរំពឹងខ្ពស់ក្នុងការដណ្ដើម ៣ពិន្ទុពីក្រុមកំពូលតារាងនេះដែរ ដ្បិតប្រវត្តិជួបគ្នាកន្លងមក ណាហ្គាវើលដ៏ពុំធ្លាប់ឈ្នះអង្គរថាយហ្គឺរលើទឹកដីខេត្តសៀមរាបឡើយ។ គ្រូបង្វឹក A-License ដដែលបន្ដថា ឆ្នាំនេះអង្គរថាយហ្គឺរបានបង្ហាញទម្រង់លេងរួមមួយដ៏ល្អ បើធៀបនឹងឆ្នាំមុនៗ។ ម្យ៉ាងដោយមានកីឡាករបរទេសល្អៗជួយផង លោកថា ការប្រកួតថ្ងៃនេះមិនងាយស្រួលនោះទេ ពិសេសប្រសិនបើអាកាសធាតុមិនអំណោយផលវិញ នឹងធ្វើឲ្យក្រុមខ្លួនជួបការលំបាកជាក់ជាមិនខាន។
នេះគឺជាការប្រកួតដ៏សំខាន់រវាងក្រុមខ្លាំងទាំងពីរ ដើម្បីរក្សាឱកាសប្រជែងជើងឯក ដ្បិតបច្ចុប្បន្នអង្គរថាយហ្គឺរកំពុងឈរកំពូលតារាង និងមាន ១៩ពិន្ទុបន្ទាប់ពីឆ្លងកាត់ ៨ប្រកួត ខណៈក្រុមណាហ្គាវើលដ៏កំពុងឈរលេខរៀងទី៦ និងមាន ១៤ពិន្ទុ តែក្រុមលោក មាស ចាន់ណា នៅសល់ប្រកួតចំណេញក្នុងដៃ ១ប្រកួតទៀត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
