នាយករដ្ឋមន្រ្តីអ៊ីស្រាអែលលោក Benjamin Netanyahu និយាយកាលពីថ្ងៃពុធថា ការលុបចោលដំណើរទស្សនកិច្ចគ្រោងទុករបស់គណៈប្រតិភូអ៊ីស្រាអែលទៅកាន់ទីក្រុងវ៉ាស៊ីងតោនក្នុងសប្តាហ៍នេះ មានន័យចង់បង្ហាញដល់ក្រុមហាម៉ាស់ថា អ៊ីស្រាអែលនឹងមិនឱនក្បាលចំពោះសំពាធអន្តរជាតិឲ្យបញ្ឈប់សង្រ្គាមនៅតំបន់ហ្កាហ្សានោះឡើយ ។

លោកនិយាយថា វាគឺជាសារដំបូង និងជាសារសំខាន់បំផុតដល់ក្រុមហាម៉ាស់ថា កុំភ្នាល់សំពាធមួយនេះ វាគ្មានប្រសិទ្ធិភាពនោះទេ ។

គួរឲ្យដឹងថា រដ្ឋមន្រ្តីក្រសួងការពារជាតិអ៊ីស្រាអែលលោក Yoav Gallant និយាយកាលពីថ្ងៃអង្គារថា លោកបានធ្វើការសង្កត់ធ្ងន់ដល់ក្រុមមន្រ្តីសហរដ្ឋអាមេរិកពីសារៈសំខាន់នៃទំនាក់ទំនងសហរដ្ឋអាមេរិក-អ៊ីស្រាអែល និងការរក្សាសមត្ថភាពប្រយុទ្ធ និងយកឈ្នះគូសត្រូវរបស់អ៊ីស្រាអែលនៅក្នុងតំបន់ រួមទាំងសមត្ថភាពដែនអាកាសរបស់ពួកគេផងដែរ ។

លោក Gallant បានថ្លែងបែបនេះប្រាប់ដល់ក្រុមអ្នកសារព័ត៌មាន អំឡុងថ្ងៃទី ២នៃជំនួបរបស់លោកជាមួយក្រុមមន្រ្តីជាន់ខ្ពស់សហរដ្ឋអាមេរិកនៅទីក្រុងវ៉ាស៊ីងតោន ស្របពេលដែលទំនាក់ទំនងនាងសម័យសង្រ្គាមរវាងប្រធានាធិបតីសហរដ្ឋអាមេរិកលោក Joe Biden និងនាយករដ្ឋមន្រ្តីអ៊ីស្រាអែលលោក Benjamin Netanyahu បានធ្លាក់ដល់ចំណុចទាបថ្មី ។

ខណៈពេលនោះដែរ ការទម្លាក់គ្រាប់បែកទៅលើលំនៅឋានយ៉ាងហោចណាស់៤ខ្នង នៅក្នុងទីក្រុង Rafah កាលពីថ្ងៃពុធ បានបង្កើនក្ដីបារម្ភថ្មីក្នុងចំណោមប្រជាពលរដ្ឋប៉ាឡេស្ទីនជាង ១លានាក់ ដែលកំពុងជ្រកកោននៅក្នុងជំរំជនភៀសខ្លួននៅជាយភាគខាងត្បូងតំបន់ហ្កាហ្សាស្ទ្រីបថា ការវាយប្រហារដោយថ្មើរជើងដែលបានកំរាមជាយូរមកហើយនោះ អាចនឹងខិតជិតចូលមកដល់ ។ 

ក្រុមមន្ត្រីសុខាភិបាលតំបន់ហ្កាហ្សា បាននិយាយថា មួយក្នុងចំណោមការវាយប្រហារតាមអាកាសជាច្រើន បានសម្លាប់មនុស្ស១១នាក់ ក្នុងក្រុមគ្រួសារតែមួយគត់ ៕