លោក Matthew Miller គឺជាអ្នកនាំពាក្យក្រសួងការបរទេសសហរដ្ឋអាមេរិក បាននិយាយថា ទីក្រុងវ៉ាស៊ីងតោនមិនជឿថាកិច្ចពិភាក្សាលើចំណាប់ថ្នូររវាងអ៊ីស្រាអែល និងក្រុមហាម៉ាស់ហួសពេលនោះទេ ហើយលោកបានបញ្ជាក់ថា ឱកាសនៅមាន ដើម្បីបន្តតាមរកការដោះលែងចំណាប់ថ្នូរដែលត្រូវបានចាប់យកទៅដោយក្រុមហាម៉ាស់ ។

 នៅពេលសួរថាប្រតិបត្តិការសឹកមានដែនកំណត់នៅទីក្រុង Rafah នឹងអាចកម្ចាត់មេបញ្ជាការសេសសល់របស់ក្រុមជីវពលប៉ាឡេស្ទីនហាម៉ាស់ឬ? លោក Miller ឆ្លើយថា ច្បាស់ណាស់ថា វានឹងអាចមានលទ្ធភាព ។

សហរដ្ឋអាមេរិកបាននិយាយថា អ៊ីស្រាអែល បានព្រមព្រៀងកំណត់កាលបរិច្ឆេទឡើងវិញនៃការចរចា រវាងប្រទេសទាំង ២ លើផែនការវាយលុកតាមជើងគោករបស់អ៊ីស្រាអែលនៅភាគខាងត្បូងតំបន់ហ្កាហ្សាស្ទ្រីប ។ 

ការលើកឡើងនេះ បានធ្វើឡើងបន្ទាប់ពីអ៊ីស្រាអែល បានលុបចោលដំណើរទស្សនកិច្ចរបស់គណៈប្រតិភូ ទៅកាន់ក្រុងវ៉ាស៊ីនតោនក្នុងសប្តាហ៍នេះ ។

 ប្រធានាធិបតីសហរដ្ឋអាមេរិកលោក Joe Biden បានបង្ហាញពីការព្រួយបារម្ភរបស់លោក ចំពោះការបាត់បង់ជីវិតជនស៊ីវិលយ៉ាងច្រើន ប្រសិនបើអ៊ីស្រាអែល វាយលុកចូលទីក្រុង Rafah នៅពេលលោកបាននិយាយទៅកាន់ នាយករដ្ឋមន្រ្តីអ៊ីស្រាអែល លោក Benjamin Netanyahu កាលពីថ្ងៃទី ១៨ ខែមីនា។ លោក បានស្នើសុំឲ្យ លោក Netanyahu បញ្ជូនគណៈប្រតិភូមួយក្រុម ដើម្បីពិភាក្សាអំពីបញ្ហានេះ ។

 ប៉ុន្តែកាលពីថ្ងៃចន្ទ អ៊ីស្រាអែល បានលុបចោលដំណើរទស្សនកិច្ចនេះ ដើម្បីតវ៉ាប្រឆាំងទៅនឹងការបរាជ័យរបស់សហរដ្ឋអាមេរិកក្នុងការប្រើសិទ្ធវេតូចំពោះសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលអំពាវនាវឲ្យមានបទឈប់បាញ់បន្ទាន់នៅក្នុងតំបន់ហ្កាហ្សា ៕