កោះកុង ៖ ផ្លូវជនបទនៅក្នុងស្រុកកោះកុង ខេត្តកោះកុង ជាច្រើនខ្សែ ស្ថិតក្រោមក្របខ័ណ្ឌក្រសួងអភិវឌ្ឍន៍ជនបទ បានស្ថាបនាស្របតាមបទដ្ឋានបច្ចេកទេសល្អប្រសើរ ដោយផ្លូវទាំងនោះបានតភ្ជាប់ប្រទាក់ក្រឡាគ្នា និងបានកំពុងផ្តល់ប្រយោជន៍ដល់ការរស់នៅរបស់ប្រជាពលរដ្ឋនៅមូលដ្ឋាន។

​ឯកឧត្តម ឈឹម សៅគី រដ្ឋលេខាធិការប្រចាំការ និងជាអនុប្រធានគណៈកម្មាធិការលទ្ធកម្ម (គ.ល) តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី២៨ ខែមីនា ឆ្នាំ២០២៤ នេះ បានដឹកនាំក្រុមការងារអន្តរក្រសួង ចុះត្រួតពិនិត្យ វាយតម្លៃបញ្ចប់សុពលភាព លើការងារ ស្ថាបនាផ្លូវ លូ និងផ្លាក ឈ្មោះផ្លូវចំនួន ៣គម្រោង ស្ថិតនៅខេត្តកោះកុង ក្នុងនោះគម្រោងទី១៖ ការងារកែលម្អផ្លូវក្រាលដីល្បាយក្រួស ទៅជាផ្លូវក្រាលកៅស៊ូ DBST ចំនួន ១ខ្សែ ប្រវែង ៤ ២០០ម៉ែត្រ, ទទឹង ៨ ម៉ែត្រ, ចិញ្ចើមផ្លូវសងខាងក្រាលដីល្បាយក្រួសទទឹងម្ខាងៗ ០,៥ ម៉ែត្រ, និងក្រាលកៅស៊ូ DBST ផ្លូវជុំវិញរង្វង់មូលជាង ៥ ពាន់ម៉ែត្រក្រឡា, ស្ថិតនៅភូមិជ្រោយប្រស់ ឃុំជ្រោយប្រស់ ស្រុកកោះកុង ខេត្តកោះកុង។ គម្រោងទី២, ការងារកែលម្អផ្លូវក្រាលដីល្បាយក្រួស ទៅជាផ្លូវក្រាលកៅស៊ូ DBST ដូចគ្នា ប្រវែង ៦ ១០០ ម៉ែត្រ, ទទឹង ៨ ម៉ែត្រ, ចិញ្ចើមផ្លូវសងខាងក្រាលល្បាយក្រួសទទឹងម្ខាងៗ ០,៥ ម៉ែត្រ, ស្ថាបនាលូប្រអប់មុខពីរចំនួន ១ កន្លែង, លូមូល មុខបីចំនួន ១ កន្លែង, លូមូលមុខពីរចំនួន ២ កន្លែង, និងផ្លាកឈ្មោះផ្លូវចំនួន ២កន្លែង ស្ថិតនៅភូមិត្រពាំងរូង ឃុំត្រពាំងរូង ទៅភូមិ ជ្រោយប្រស់ ឃុំជ្រោយប្រស់ស្រុកកោះកុង ខេត្តកោះកុង។

ចំពោះគម្រោងទី៣ គឺការងារស្ថាបនាផ្លូវក្រាលដីល្បាយក្រួសចំនួន ១ ខ្សែ ប្រវែង ៣ ០០០ ម៉ែត្រ, ទទឹង ៨ ម៉ែត្រ, ស្ថាបនា លូប្រអប់មុខបួនចំនួន ១ កន្លែង, លូប្រអប់មុខបី ចំនួន ១ កន្លែង, លូមូលមុខមួយចំនួន ២កន្លែង, និងផ្លាកឈ្មោះផ្លូវចំនួន ២ កន្លែង ស្ថិតនៅភូមិជ្រោយប្រស់ ឃុំជ្រោយប្រស់ ស្រុកកោះកុង ខេត្តកោះកុង ដែលគម្រោងទំាងអស់នេះអនុវត្តដោយ នាយកដ្ឋានវិស្វកម្ម ក្រសួងការពារជាតិ ប្រើប្រាស់ថវិកាជំពូក២១។

ជុំវិញគម្រោងផ្លូវខាងលើនេះ, ឯកឧត្តម ឈឹម សៅគី លើកឡើងបន្តថា ចំពោះការស្ថាបនាផ្លូវ និងស្ពាន ពិតជាមានសារៈ សំខាន់ណាស់ ដោយបានកំពុងផ្តល់អត្ថប្រយោជន៍ សម្រាប់ជួយសម្រួលដល់ការធ្វើដំណើររបស់ប្រជាពលរដ្ឋ និងសាធារណជនទូទៅ ជាពិសេសសម្រួលការដឹកទំនិញចេញ-ចូលពីកំពង់ផែនៅទីនោះជាដើម។ ឯកឧត្តម លើកឡើងបន្ថែមថា ការអភិវឌ្ឍហេដ្ឋារចនាសម្ព័ន្ធ ជាពិសេសការអភិវឌ្ឍនៅតាមមូលដ្ឋាន ដែលស្ថិតនៅក្រោមក្របខ័ណ្ឌក្រសួងអភិវឌ្ឍន៍ជនបទ បានកំពុងតភ្ជាប់មានភាពប្រទាក់ក្រឡាទៅកាន់តំបន់ផ្សេងៗ ដែលគម្រោងទាំងនោះ គឺបានកើតឡើងក្រោមការខិតខំប្រឹងប្រែងរបស់រាជរដ្ឋាភិបាល ដែលបានគិតគូរ និងមានផែនការច្បាស់លាស់ ក្នុងគោលដៅតភ្ជាប់ផ្លូវពីមូលដ្ឋាន មកកាន់ទីប្រជុំជន និងទីក្រុងជាដើម៕

អត្ថបទ៖ សុន រ៉ាឌី