អ្នកបើកម្នាក់ នៅលើនាវាដឹកទំនិញដែលបានធ្វើឲ្យស្ពាន Francis Scott Key របស់ទីក្រុង Baltimore បាក់រលំ បាននិយាយតាមវិទ្យុទាក់ទង ដើម្បីសុំជំនួយនាវាសណ្ដោង បន្ទាប់មកបានរាយការណ៍ពីការដាច់ចរន្តអគ្គិសនីនៅលើនាវា ពោលគឺប៉ុន្មាននាទីមុននឹងនាវានោះបុកបង្គោលសសរស្ពាន។

បើយោងតាមអាជ្ញាធរសុវត្ថិភាពសហព័ន្ធ កាលពីថ្ងៃពុធ (ទី២៧ ខែមីនា) បានឲ្យដឹងថា នោះគឺជាការបង្ហាញពីគ្រោះថ្នាក់លើកដំបូងរបស់នាវាដល់មន្ត្រីកំពង់ផែ។ បណ្ដាមន្ត្រីទាំងនោះបានទាញយកសំឡេងពីឧបករណ៍ថតទិន្នន័យ «Black Box» (ប្រអប់ខ្មៅ) របស់នាវា បន្ទាប់ពីឡើងលើនាវាដឹកទំនិញដែលមានឧបទ្ទវហេតុនោះ ដើម្បីស៊ើបអង្កេត។

ប្រធានក្រុមប្រឹក្សាសុវត្ថិភាពដឹកជញ្ជូនជាតិ លោកស្រី Jennifer Homendy បាននិយាយថា ទិន្នន័យរបស់ឧបករណ៍ថតចម្លង គឺ «ស្របទៅនឹងការដាច់ចរន្តអគ្គិសនី» ប៉ុន្តែមូលហេតុនាំឲ្យគាំងដំណើរការពិតប្រាកដ មិនទាន់ត្រូវបានបញ្ជាក់នៅឡើយទេ។ ឧបករណ៍ថតសំឡេងក៏បានចាប់យកពាក្យបញ្ជាដល់នាវិកឲ្យទម្លាក់យុថ្កា ដែលទំនងជាមានគោលបំណងធ្វើឲ្យនាវារសាត់យឺតៗ។

លោកស្រី Homendy បាននិយាយថា អ្នកបើកបរ ២នាក់របស់នាវានេះ នឹងត្រូវបានសួរនាំ នៅថ្ងៃបន្ទាប់ ហើយការស៊ើបអង្កេតរកមូលហេតុនៃឧបទ្ទវហេតុនេះអាចចំណាយពេលដល់ទៅ ២ឆ្នាំ។

ជាមួយគ្នានេះ អ្នកមុជទឹកបានស្រង់យកសាកសពកម្មករផ្លូវថ្នល់ ២នាក់ ក្នុងចំណោមកម្មករបាត់ខ្លួន ៦នាក់ ដែលបានធ្លាក់ចូលទឹក ក្នុងពេលដែលស្ពាន បានបាក់រលំ ហើយត្រូវបានសន្មត់ថា ស្លាប់។ នគរបាលរដ្ឋ Maryland វរសេនីយ៍ឯកលោក Roland Butler បាននិយាយថា សាកសពរបស់ពួកគេត្រូវបានរកឃើញនៅក្នុងរថយន្តដឹកទំនិញភីកអាប់ជម្រៅប្រហែល ២៥ហ្វីត (៧,៦២ម៉ែត្រ) ក្រោមទឹក៕