រដ្ឋមន្រ្តីការបរទេសអ៊ុយក្រែនលោក Dmytro Kuleba និយាយថា លោកបានមកដល់រដ្ឋធានីញូវដែល្លីនៅថ្ងៃព្រហស្បតិ៍នេះ ដើម្បីបង្កើនចក្ខុវិស័យរបស់ទីក្រុងគីវលើផ្លូវសន្តិភាពនៅអ៊ុយក្រែន និងពង្រឹងទំនាក់ទំនងជាមួយឥណ្ឌា ។

 លោក Kuleba បានសរសេរនៅលើបណ្តាញព័ត៌មានសង្គម X អតីតបណ្តាញព័ត៌មានសង្គម Twitterថា ផ្អែកលើកិច្ចពិភាក្សារវាងប្រធានាធិបតីអ៊ុយក្រែន លោក Volodymyr Zelenskiy និងនាយករដ្ឋមន្រ្តីឥណ្ឌាលោក Narendra Modi ពួកយើងនឹងចាប់អារម្មណ៍ជាពិសេសលើផែនការសន្តិភាព ។

 លោក Kuleba បានធ្វើដំណើរទៅកាន់ស្តូបអនុស្សាវរីយ៍ ដែលឧទ្ទិសដល់វិរបុរសឯករាជ្យឥណ្ឌាលោក មហាត្មៈ គន្ធី និងបានគោរពវិញ្ញាណក្ខន្ធបិតាសេរីភាពរូបនេះ ។

 អ៊ុយក្រែន សង្ឃឹមថានឹងរៀបចំកិច្ចប្រជុំកំពូលក្រុមមេដឹកនាំពិភពលោកដោយគ្មានការចូលរួមរបស់រុស្ស៊ី នារយៈពេលប៉ុន្មានខែទៀតនេះ ដើម្បីពន្លឿនផែនការសន្តិភាពឲ្យរុស្ស៊ីដកទ័ពចេញពីដែនដីរបស់ពួកគេ ៕