ទារកប៉ាឡេស្ទីនអាយុ ២ខែម្នាក់ដែលទទួលរងកង្វះខាតអាហារូបត្ថម្ភធ្ងន់ធ្ងរ ត្រូវបាននាំទៅកាន់មន្ទីរពេទ្យ Kamal Adwan ស្ថិតនៅភាគខាងជើងតំបន់ហ្កាហ្សាស្រ្ទីប ។
ក្មេងស្រី Leila Jeneid បានកើតអំឡុងសង្រ្គាមកំពុងបន្តនៅហ្កាហ្សា ជាទីដែលកង្វះខាតស្បៀងអាហារ និងសារធាតុចិញ្ចឹមសំខាន់ៗ បានក្លាយជាការលំបាកសមូហភាពនៅក្នុងដែនដីបិទច្រកមួយនេះ ។
លោក Ahmed Al-Ali គឺជាគ្រូពេទ្យប៉ាឡេស្ទីនមួយរូប និយាយថា រាល់វេនប្រចាំការថែទាំអ្នកជំងឺធ្ងន់ធ្ងរ លោកជួបរឿងបែបនេះ ៣ ទៅ ៤ករណី ចាប់ពីករណីធ្ងន់ធ្ងរ រហូតករណីធ្ងន់ធ្ងរខ្លាំង ហើយលទ្ធផលចុងក្រោយមានតែការស្លាប់មួយប៉ុណ្ណោះ ។
របាយការណ៍គាំទ្រដោយអង្គការសហប្រជាជាតិ(UN) បាននិយាយថា គ្រោះទុរ្ភិក្សជិតមកដល់ ហើយទំនងជាកើតមានក្នុងខែឧសភា នៅតំបន់ភាគខាងជើងហ្កាហ្សា ហើយអាចនឹងរីករាលដាលពេញតំបន់បិទច្រកមួយនេះ នៅខែកក្កដា ក្រោយសង្រ្គាមអស់រយៈពេលជាង ៥ខែ ដែលបានបំផ្លិចបំផ្លាញដែនដីប៉ាឡេស្ទីនមួយនេះ ស្ទើតែទាំងស្រុង ក៏ដូចជាបានកាត់ផ្តាច់ការផ្គត់ផ្គង់ ។
គួរឲ្យដឹងថា ក្រសួងសុខាភិបាលប៉ាឡេស្ទីនគ្រប់គ្រងដោយក្រុមហាម៉ាស់ បាននិយាយកាលពីថ្ងៃពុធថា ចំនួនអ្នកស្លាប់របស់ពលរដ្ឋប៉ាឡេស្ទីនពីការវាយប្រហាររបស់អ៊ីស្រាអែល បានកើនឡើងដល់ ៣២.៤៩០នាក់ ។
ក្រសួងបាននិយាយនៅក្នុងសេចក្តីថ្លែងការណ៍ថា ក្នុងរយៈពេល ២៤ ម៉ោង កន្លងទៅនេះ កងទ័ពអ៊ីស្រាអែល បានសម្លាប់ពលរដ្ឋប៉ាឡេស្ទីន ៧៦នាក់ និង ១០២នាក់ផ្សេងទៀតបានរងរបួស ធ្វើឲ្យចំនួនអ្នកស្លាប់សរុបនៅតំបន់ហ្កាហ្សា ចាប់តាំងពីជម្លោះអ៊ីស្រាអែល និងក្រុមហាម៉ាស បានផ្ទុះឡើងកាលពីថ្ងៃទី ៧ ខែតុលា ឆ្នាំ ២០២៣ កើនឡើងដល់ ៣២.៤៩០នាក់ និងអ្នករបួសកើនឡើងដល់ ៧៤.៨៨៩ នាក់ ៕