អ្នកប្រឆាំង «ក្រុមអាវក្រហម» របស់ប្រទេសថៃ បានវិលត្រឡប់មកកាន់មាតុភូមិរបស់ខ្លួនវិញ នៅថ្ងៃព្រហស្បតិ៍ (ទី២៨ ខែមីនា) នេះ បន្ទាប់ពីនិរទេសដោយខ្លួនឯងរយៈពេល ១៥ឆ្នាំ ហើយត្រូវបាននគរបាលរបស់ព្រះរាជាណាចក្រមួយនេះ ឃាត់ខ្លួនភ្លាមៗ។ នេះបើតាមមេធាវីរបស់អ្នកប្រឆាំងដ៏លេចធ្លោរូបនេះ។

លោក Jakrapob Penkair (ចក្រភព ផេនឃែ) គឺជាអ្នកនាំពាក្យរដ្ឋាភិបាលរបស់អតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត់ ហើយបន្ទាប់មកជាសមាជិកដ៏លេចធ្លោនៃចលនា «ក្រុមអាវក្រហម» ដែលគាំទ្រលោក ថាក់ស៊ីន បន្ទាប់ពីលោកត្រូវបានទម្លាក់ចេញពីអំណាចដោយរដ្ឋប្រហារយោធា ក្នុងឆ្នាំ២០០៦។

ដោយប្រឈមជាមួយនឹងការចោទប្រកាន់ជាច្រើនករណី ក្នុងនោះរួមទាំងការកាន់កាប់អាវុធដោយខុសច្បាប់ និងការរំលោភបំពានលើច្បាប់ប្រមាថព្រះមហាក្សត្រដ៏តឹងរឹងរបស់ព្រះរាជាណាចក្រនេះ លោក Jakrapob បានភៀសខ្លួនចេញពីថៃ ក្នុងឆ្នាំ២០០៩ ដើម្បីរស់នៅនិរទេសខ្លួនឯង។ លោកបានចុះចតនៅអាកាសយានដ្ឋានសុវណ្ណភូមិក្នុងទីក្រុងបាងកក នៅថ្ងៃទី២៨ ខែមីនា ហើយត្រូវបាននគរបាលចាប់ខ្លួនភ្លាមៗតែម្ដង។

មេធាវីរបស់លោក Jakrapob បានប្រាប់អ្នកសារព័ត៌មានថា៖ «លោក Jakrapob នឹងចូលក្នុងដំណើរការផ្លូវច្បាប់ ហើយយើងនឹងចាំមើលថា យើងអាចធ្វើអ្វីបាន»។

មុនពេលហោះត្រឡប់ទៅកាន់ប្រទេសវិញ លោក Jakrapob បានបង្ហោះវីដេអូដែលលោកនិយាយទៅកាន់អ្នកគាំទ្រ។ លោកបាននិយាយថា៖ «ខ្ញុំបាននៅឆ្ងាយពីប្រទេសអស់រយៈពេល ១៥ឆ្នាំមកហើយ ឥឡូវនេះខ្ញុំនឹងវិលត្រឡប់ទៅប្រទេសថៃវិញ ហើយខ្ញុំសង្ឃឹមថា ខ្ញុំអាចតបស្នងប្រទេសបាន»។

គួរបញ្ជាក់ថា ការវិលត្រឡប់ទៅវិញរបស់លោកបានកើតឡើងជាច្រើនខែ បន្ទាប់ពីមហាសេដ្ឋី ដែលជាអតីតនាយករដ្ឋមន្ត្រី លោក ថាក់ស៊ីន បានធ្វើមាតុភូមិនិវត្តន៍ បន្ទាប់ពីបាននិរទេសខ្លួនអស់រយៈពេលជាងមួយទសវត្សរ៍កន្លះ៕