ក្រុមតន្រ្តីរ៉ុករុស្ស៊ីសម័យសូវៀត ឈ្មោះ Picnic ដែលការប្រគុំតន្ត្រីនៅឯសាល Crocus ក្បែរទីក្រុងមូស្គូ ត្រូវបានវាយប្រហារដោយខ្មាន់កាំភ្លើង កាលពីសប្តាហ៍មុននោះ បានរៀបចំកម្មវិធីសម្ដែងរំលឹកដល់ជនរងគ្រោះមួយ នៅទីក្រុង St. Petersburg កាលពីថ្ងៃពុធ (ទី២៧ ខែមីនា)។

សូមរំលឹកថា កាលពីថ្ងៃសុក្រ (២២ មីនា) ក្រុមអ្នកវាយប្រហារប្រដាប់អាវុធ បានបាញ់រះសំដៅទៅអ្នកចូលមើលការប្រគុំតន្ត្រី ដោយអាវុធស្វ័យប្រវត្តិ ហើយបានធ្វើឲ្យកន្លែងនោះមានអគ្គិភ័យភ្លាមៗ មុនពេលក្រុមតន្រ្តីនេះត្រូវបានសម្ដែងនៅក្នុងសាលដែលពេញទៅដោយមនុស្ស ៦.២០០នាក់។

ចំនួនអ្នកស្លាប់ជាផ្លូវការពីការវាយប្រហារ នាពេលនេះ មានចំនួន ១៤០នាក់ និងរបួស ១៨២នាក់ផ្សេងទៀត។ ប្រព័ន្ធផ្សព្វផ្សាយក្នុងស្រុកបានរាយការណ៍ថា ជំនួយការនាយកតន្ត្រីរបស់ក្រុមនេះ គឺស្ថិតក្នុងចំណោមអ្នកដែលត្រូវបានសម្លាប់។

ដំបូងឡើយ សមាជិកនៃក្រុម Picnic កំពុងពិចារណាលុបចោលការប្រគុំតន្ត្រី កាលពីថ្ងៃពុធនោះ ប៉ុន្តែក្រោយមកបានប្រកាសថា ខ្លួននឹងដំណើរការទៅតាមការគ្រោងទុក ដោយប្រាក់ចំណូលទាំងអស់ត្រូវបានបរិច្ចាគទៅឲ្យជនរងគ្រោះក្នុងការវាយប្រហារនេះ៕