រដ្ឋាភិបាលរបស់នាយករដ្ឋមន្ត្រីក្រិក លោក Kyriakos Mitsotakis ប្រឈមនឹងការបោះឆ្នោតដកទំនុកចិត្ត នៅថ្ងៃព្រហស្បតិ៍ (ទី២៨ ខែមីនា) នេះ ជុំវិញការដោះស្រាយ ចំពោះឧបទ្ទវហេតុរថភ្លើង កាលពីឆ្នាំមុន ដែលបានសម្លាប់មនុស្សចំនួន ៥៧នាក់ បន្ទាប់ពីមានរបាយការណ៍ពីប្រព័ន្ធផ្សព្វផ្សាយលេចឡើងក្នុងសប្តាហ៍នេះ ដោយចោទប្រកាន់ថា មានការរៀបចំប្រឌិដ្ឋភស្តុតាង។
គណបក្សប្រឆាំងឆ្វេងនិយមបានដាក់ញត្តិរិះគន់ប្រឆាំងរដ្ឋាភិបាលអភិរក្សនិយម នៅសប្តាហ៍នេះ ដោយចោទប្រកាន់ថា «កំពុងព្យាយាមលាក់បាំងការពិត» បន្ទាប់ពីរថភ្លើងដឹកទំនិញបានបុកជាមួយរថភ្លើងដឹកអ្នកដំណើរ នៅភាគកណ្តាលប្រទេសក្រិក ដែលជាគ្រោះថ្នាក់ដ៏អាក្រក់បំផុត ក្នុងប្រវត្តិសាស្ត្ររបស់ប្រទេសនេះ។
តែរដ្ឋាភិបាលបដិសេធនូវការធ្វើខុសណាមួយ ហើយត្រូវបានរំពឹងថា នឹងរួចផុតពីការបោះឆ្នោតនេះ ដោយសារគណបក្សរបស់ខ្លួនមានសំឡេងភាគច្រើន។ ប៉ុន្តែញត្តិនេះគូសបញ្ជាក់ថា តើមានមនុស្សប៉ុន្មាននាក់នៅតែខឹងសម្បា ចំពោះគ្រោះមហន្តរាយនេះដែលបង្ហាញពីររបៀបធ្វើការយ៉ាងធ្វេសប្រហែសជាច្រើនទសវត្សរ៍ និងការគ្រប់គ្រងមិនត្រឹមត្រូវ បានបង្កគ្រោះថ្នាក់ដល់សុវត្ថិភាពផ្លូវដែកយ៉ាងដូចម្ដេច។ អ្នកជំនាញនិយាយថា មានការផ្លាស់ប្តូរតិចតួចណាស់ ក្នុងការកែលម្អស្តង់ដារ ចាប់តាំងពីពេលនោះមក៕