ក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី២៩ ខែមីនា ឆ្នាំ២០២៤នេះ បានចាប់ផ្តើមបើកប្រាក់ឈ្នួលនិងប្រាក់បំណាច់ផ្សេងៗជូនកម្មកររោងចក្រ អ.ជី ហ្វ៊ូតវែរ (ខេមបូឌា) ឯ.ក ដែលរងគ្រោះដោយសារអគ្គិភ័យ នៅសាលាស្រុកអង្គស្នួល ខេត្តកណ្តាល។

មន្រ្តីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា ការងារនេះ នឹងចាប់ផ្តើមពីម៉ោង៩ព្រឹក ដល់ម៉ោង៥ល្ងាច ដោយមានមន្ត្រីទទួលបន្ទុកសម្របសម្រួលបើកប្រាក់ឈ្នួល និងអាជ្ញាធរពាក់ព័ន្ធ បានរៀបចំបិទបញ្ជីឈ្មោះ សណ្តាប់ធ្នាប់ និងរបៀបរៀបរយដើម្បីសម្រួលដល់កម្មករនិយោជិតបើកប្រាក់ឈ្នួល និងប្រាក់បំណាច់ផ្សេងៗឱ្យបានរលូន។ មន្រ្តីរូបនេះបានបញ្ជាក់ថា កម្មករនិយោជិតដែលនឹងត្រូវបើកប្រាក់ទាំងនេះដោយភ្ជាប់មកជាមួយនូវឯកសារ មានដូចជា៖ប័ណ្ណសម្គាល់ខ្លួនកម្មករនិយោជិត (ច្បាប់ដើម) ឬកិច្ចសន្យាការងារ និងសៀវភៅការងារកម្មករនិយោជិត ឬប័ណ្ណសមាជិក ប.ស.ស. ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន និងប័ណ្ណបើកប្រាក់ឈ្នួលប្រចាំខែរបស់កម្មករនិយោជិតម្នាក់ៗ (បើមាន)សម្រាប់បើកប្រាក់ឈ្នួល។

បន្ទាប់ពីទទួលបានប្រាក់ឈ្នួល និងប្រាក់បំណាច់ផ្សេងៗ កម្មករ កម្មការិនី បានបង្ហាញនូវទឹកមុខសប្បាយរីករាយ និងសម្តែងការអរគុណរាជរដ្ឋាភិបាលដែលបានបើកប្រាក់ជូនកម្មករនិយោជិត ដែលទាំងនេះបង្ហាញពីការយកចិត្តទុក្ខដាក់អំពីសុខទុក្ខរបស់ពួកគាត់ ក្រោយជួបការលំបាកនេះ។ ក្រុមកម្មករបានឲ្យដឹងស្រដៀងគ្នាទៀតថា ពួកគាត់មិននឹកស្មានថា នឹងអាចទទួលបានការគិតគូរទបែបនេះទេសូម្បីប្រាក់ខែចុងក្រោយដោយសាររោងចក្រឆេះខូចខាតទាំងស្រុង និងជួបការលំបាកដូចគ្នាទាំងថៅកែ និងកម្មកររោងចក្រ។

សូមបញ្ជាក់ថា កាលពីល្ងាចថ្ងៃទី១៨ ខែមីនា ឆ្នាំ២០២៤កន្លងទៅ រោងចក្រ អ.ជី ហ្វ៊ូតវែរ (ខេមបូឌា) ឯ.ក ជួបឧបទ្ទវហេតុអគ្គិភ័យភ័យឆេះរោងចក្រអស់ទាំងស្រុង ដែលមានទីតាំងស្ថិតនៅភូមិអណ្តូង ឃុំបែកចាន ស្រុកអង្គស្នួល ខេត្តកណ្តាល ក្នុងនោះមានកម្មករនិយោជិតធ្វើការចំនួន ២,២០៥នាក់។ ជាមួយគ្នានេះ ដើម្បីជួយសម្រាលទុក្ខលំបាករបស់កម្មករនិយោជិត ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា សម្រាប់អត្ថប្រយោជន៍ ប.ស.ស. រួមមាន ផ្នែកថែទាំសុខភាព អត្ថប្រយោជន៍នៅពេលសម្រាលកូន និងការពិនិត្យផ្ទៃពោះ កម្មករនិយោជិតនៅតែទទួលបានអត្ថប្រយោជន៍ និងប្រើប្រាស់ ប.ស.ស. ជាធម្មតា៕ អត្ថបទ ឈិត បូរ៉ាវី