នាថ្ងៃទី២៦ដល់២៨ ខែមីនា ឆ្នាំ២០២៤នេះ ឯកឧត្តម សួន សេរីរដ្ឋា រដ្ឋលេខាធិការក្រសួងអភិវឌ្ឍន៍ជនបទ បានបន្តចុះដឹកនាំក្រុមការងារក្រសួង ជួបប្រជុំការងារជាមួយប្រធានមន្ទីរអភិវឌ្ឍន៍ជនបទ ក្រុមការងារការិយាល័យពាក់ព័ន្ធមន្ទីរ និងមន្រ្តីជំនាញពីមន្ទីរសេដ្ឋកិច្ច និងហិរញ្ញវត្ថុខេត្ត ពិនិត្យការអនុវត្តផែនការសកម្មភាព និងផែនការថវិកា លើការងារអភិវឌ្ឍន៍ និងអភិរក្សជនជាតិដើមភាគតិច ដើម្បីពិនិត្យលទ្ធភាពពង្រីកថវិកា សម្រាប់អនុវត្តន៍សកម្មភាពការងារជនជាតិដើមភាគតិច នៅក្នុងខេត្តចំនួន៣ រួមមាន ខេត្តបន្ទាយមានជ័យ ខេត្តសៀមរាប និងខេត្តកំពង់ធំ។
នាព្រឹកថ្ងៃទី២៦មីនា ឯកឧត្តមរដ្ឋលេខាធិការ បានដឹកនាំក្រុមការងារក្រសួងអភិវឌ្ឍន៍ជនបទប្រជុំពិភាក្សាដើម្បីពិនិត្យលទ្ធភាពពង្រីកថវិកា សម្រាប់អនុវត្តន៍សកម្មភាពការងារជនជាតិដើមភាគតិចនៅខេត្តបន្ទាយមានជ័យ រួមមាន ៖ ការកំណត់អត្តសញ្ញាណ ការកសាងមជ្ឈមណ្ឌលវប្បធម៌ជនជាតិដើមភាគតិច និងរៀបចំសហគមន៍គំរូជនជាតិដើមភាគតិច។ ក្រៅពីកិច្ចការលើសកម្មភាពជនជាតិដើមភាគតិច ឯកឧត្តម សួន សេរីរដ្ឋា រដ្ឋលេខាធិការ ក៏បានណែនាំមន្ត្រីនៃមន្ទីរទាំងពីរ ត្រូវបន្តកិច្ចសហការល្អធ្វើការជាមួយគ្នា និងបានរំលឹកឲ្យមន្ទីរអភិវឌ្ឍន៍ជនបទ ត្រូវយកចិត្តទុកដាក់គ្រប់កម្មវិធីទាំង៤ របស់ក្រសួងអភិវឌ្ឍន៍ជនបទ ដោយមិនត្រូវមើលរំលងឬទុកអនុកម្មវិធី នៃកម្មវិធីណាមួយចោលឡើយ។
នារសៀលថ្ងៃដដែលនោះដែរឯកឧត្តមបានបន្តចុះដឹកនាំប្រជុំនៅមន្ទីអភិវឌ្ឍន៍ជនបទខេត្តសៀមរាប ក្នុងកិច្ចប្រជុំដ៏មានសារៈសំខាន់នេះ គឺដូចគ្នានឹងការងារខេត្តដទៃទៀតដែរ ដែលមានជនជាតិដើមភាគតិចកំពុងរស់នៅ គឺសំដៅធ្វើយ៉ាងណាឲ្យមន្ទីរ និងការិយាល័យជនជាតិដើមភាគតិច ទទួលបានថវិកាជាឥណទានកើនឡើងសម្រាប់យកមកអនុវត្តសកម្មភាពរបស់ខ្លួននៅថ្នាក់ក្រោមជាតិ។ ហើយក្រៅពីនោះ ឯកឧត្តមបាននាំយកនូវអនុសាសន៍របស់ ឯកឧត្តមរដ្ឋមន្ត្រី ឲ្យគ្រប់មន្ត្រីមន្ទីរអភិវឌ្ឍន៍ជនបទទាំងអស់ ត្រូវស្គាល់នូវកម្មវិធីទាំង ៤ របស់ក្រសួងឲ្យបានច្បាស់លាស់ ហើយត្រូវអនុវត្តប្រកបដោយការទទួលខុសត្រូវស្មើៗគ្នា ។
ក្រោយពីចប់កិច្ចប្រជុំទាំង២ខេត្តខាងលើនៅព្រឹកថ្ងៃទី២៧ ខែមីនា ឆ្នាំ២០២៤ ក្នុងដំណើរបំពេញបេសកកម្ម ៣ខេត្ត ជុំវិញបឹងទន្លេសាប ឯកឧត្តមរដ្ឋលេខាធិការ បានចូលទស្សនា ភូមិសហគមន៍ជនជាតិដើមភាគតិច (កួយ) នៅឃុំវាលវែង ស្រុកប្រាសាទបាល្លង្គ ដែលបានទទួលប្រកាសអត្តសញ្ញាណរួចហើយ និងកំពុងពង្រឹងសហគមន៍ឲ្យក្លាយទៅជា «សហគមន៍គំរូ ជនជាតិដើមភាគតិច»នាពេលខាងមុខ ។ ក្រោយពីកិច្ចចងដៃស្វាគមន៍ និងសំណេះសំណាលរួច«ស្តាប់សំឡេងសហគមន៍ជនជាតិដើមភាគតិច និងបទពិសោធន៍ដឹកនាំសហគមន៍របស់ពួកគាត់ ឯកឧត្តមក៏បានផ្តាំផ្ញើរឲ្យសហគមន៍ពង្រឹងសាមគ្គីភាព កុំឲ្យបែកបាក់គ្នាហើយខិតខំលើកភាពជាគំរូដើម្បីឲ្យសហគមន៍ផ្សេងទៀតយកគំរូតាម…។ បន្ទាប់មកនារសៀលថ្ងៃដដែលនោះដែរឯកឧត្តម សួន សេរីរដ្ឋា និងក្រុមការងារនាយកដ្ឋានអភិវឌ្ឍន៍ជនជាតិដើមភាគតិច អមដំណើរដោយលោកមេឃុំសាលាវិស័យ និងប្រធានសហគមន៍ជនជាតិដើម (កួយ) ចុះទស្សនា ឃ្លាំងស្រូវពូជ (ស្រូវខ្មៅ) មើលរោងការិយាល័យសន្សំប្រាក់ និងផ្សារសហគមន៍ គ្រប់វិស័យសម្រាប់សហគមន៍នៅទីនេះ គឺមានភាពរីកចម្រើនគួរឲ្យកត់សម្គាល់និងទទួលស្គាល់ជា សហគមន៍គំរូជនជាតិដលមភាគតិច (កួយ)។ ក្នុងនោះសហគមន៍មានដីមួយកន្លែងដែលបម្រុងធ្វើជាទីលានកីឡាបាល់ទាត់ និងបាល់ទះ ឯកឧត្តមបានប្រាប់ឲ្យរៀបចំឲ្យបានស្អាត រួចឯកឧត្តមនឹងគិតគូគៀងគររកជំនួយមកជួយផ្តល់ជាសម្ភារៈ និងតារាងបាល់ សម្រាប់ជូនកីឡាសហគមន៍ជនជាតិកួយ។
ដោយឡែកនាព្រឹកថ្ងៃទី២៨ ខែមីនា ឆ្នាំ២០២៤ នៅសាលប្រជុំមន្ទីរអភិវឌ្ឍន៍ជនបទខេត្តកំពង់ធំ ឯកឧត្តមសួន សេរីរដ្ឋា បានដឹកនាំការងារប្រជុំ អន្តរមន្ទី (មន្ទីអភិវឌ្ឍន៍ជនបទ និងមន្ទីរសេដ្ឋកិច្ចហិរញ្ញវត្ថុ) ដើម្បីពិនិត្យលើការងាររៀបចំផែនការយុទ្ធសាស្ត្រ សកម្មភាព និងថវិកា សម្រាប់អនុវត្តលើការងារសកម្មភាពជនជាតិដើមភាគតិច។ កិច្ចប្រជុំបានបើកដំណើរការដោយរលូន ដោយការបង្ហាញត្រង់ៗអំពីផែនការសកម្មភាព និងអនុគណនេយ្យថវិកា ដែលគាំទ្រសកម្មភាព ព្រមទាំងបានដោះស្រាយនូវចំណុចយល់ច្រឡំមួយចំនួន ដែលកន្លងមកធ្វើឲ្យមានភាពរាំងស្ទះ និងប្រឈមការខ្វះខាតថវិកា ហើយក្រោយចប់កិច្ចប្រជុំនេះបានឲ្យគ្រប់ភាគីយល់ជ្រួតជ្រាប និងរួមគ្នាកែតម្រូវទាំងអស់គ្នា៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
