ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួបជាមួយ ឯកឧត្តមសាស្ត្រាចារ្យ HA IL-Soo នាយកអង្គការ Korea Foundation for International Healthcare (KOFIH-កូហ្វី) និងលោក Song Yonggun ប្រធានប្រចាំប្រទេសកម្ពុជា និងក្រុមការងារ, នាព្រឹកថ្ងៃទី២៩ ខែមីនា ឆ្នាំ២០២៤ នៅទីស្តីការក្រសួងសុខាភិបាល ។

ឯកឧត្តមសាស្ត្រាចារ្យរដ្ឋមន្ត្រី បានសំដែងអំណរគុណ និង​វាយតម្លៃ​ខ្ពស់​លើ​កិច្ច​សហប្រតិបត្តិការ​ជាដៃ​គូជា​មួយអង្គការ KOFIH ចាប់តាំងពីឆ្នាំ២០១១កន្លងមក និងបានគូសបញ្ជាក់ថា គម្រោង​របស់ KOFIH ពិតជាបានគាំទ្រ និងជួយចំកន្លែងដែលមានតម្រូវការ មានលក្ខណៈច្បាស់លាស់ និង​និរន្តរ​ភាព ក្នុងគោលដៅបម្រើផលប្រយោជន៍សុខុមាលភាពរបស់ប្រជាជនកម្ពុជា និង​លើក​កម្ពស់​សមត្ថភាព​របស់​បុគ្គលិកសុខាភិបាល និងគុណភាពសេវាសុខាភិបាល។

ឯកឧត្តមសាស្ត្រាចារ្យ HA IL-Soo បានបញ្ជាក់​អំពី​ជំហរ​ពង្រឹក​កិច្ច​សហ​ប្រតិបត្តិការ​លើ​ការ​លើក​កម្ពស់​គុណភាព​សេវាថែទាំសុខភាព និងការពង្រឹងការគ្រប់គ្រងជំងឺរ៉ាំរ៉ៃ នៅភាគ​ពាយ័ព្យ​នៃ​ប្រទេស​កម្ពុជា គម្រោងពង្រឹងការគ្រប់គ្រងជំងឺឆ្លង និងការឆ្លើយ​តប​បន្ទាន់​តាម​តំបន់​ព្រំដែន​នៅ​ភាគ​ពាយ័ព្យ​នៃ​ប្រទេសកម្ពុជា ព្រមទាំងការ​ពង្រីក​វិសាលភាព នៃ​កិច្ច​សហ​ប្រតិបត្តិការ​ជាមួយ​ក្រសួ​ង​សុខាភិបាល តាមរយៈជំនួយបណ្តុះបណ្តាលធនធានមនុស្ស ក្រោមកម្មវិធីអាហារូបករណ៍ Dr LEE Jong-wook (LJWFP) និងគម្រោងលើកកម្ពស់គុណភាពការថែទាំបន្ទាន់ សម្រាប់​គម្រោង​ថែ​ទាំសម្ភព និងរោគស្ដ្រី និងការសង្គ្រោះទារកទើបនឹងកើត នៅតំបន់ភាគ​ពាយ័ព្យ នៃ​ប្រទេស​កម្ពុជា (EmONC) រួមទាំង ការពង្រឹងសេវាថែទាំសុខភាព នៃអន្តរាគមន៍ដំបូង និង​ស្តារ​នីតិ​សម្បទា សម្រាប់ជនមានពិការភាពនៅប្រទេសកម្ពុជា ផងដែរ។

ឯកឧត្តមសាស្ត្រាចារ្យរដ្ឋមន្ត្រី បានសំដែងនូវការកោតសសើរ និងលើកទឹកចិត្តឱ្យអង្គការ KOFIH ពង្រីក​វិសាលភាពនៃគម្រោងដែលកំពុងអនុវត្តទៅកាន់បណ្តាខេត្តមួយចំនួនទៀត ព្រមទាំង​បង្កើត​គម្រោង​បន្ថែម ជាពិសេសផ្នែកការថែទាំទារកទើបនឹងកើត ដើម្បីរួមចំណែក​កាត់​បន្ថយ​អត្រា​មរណៈភាព​ទារក និងកុមារនៅកម្ពុជា។ ឯកឧត្តមសាស្រ្តាចារ្យរដ្ឋមន្ត្រី បានស្នើ KOFIH បន្តគាំទ្រ​ការ​បណ្តុះ​បណ្តាលសមត្ថភាពគ្រប់គ្រងមន្ទីរពេទ្យសាកលវិទ្យាល័យ ការលើក​កម្ពស់​ក្រម​សីល​ធម៌​វិជ្ជាជីវៈ ការកសាងហេដ្ឋារចនាសម្ព័ន្ធអគារផ្នែកសម្ពព និងកុមារ និងប្រព័ន្ធបញ្ជូន ព្រមទាំង​បន្ត​ពង្រីក​កិច្ច​សហប្រតិបត្តិការដែលមានស្រាប់ជាមួយក្រសួងសុខាភិបាល ដើម្បីរួមចំណែក​ជាមួយ​រាជ​រដ្ឋាភិបាល​កម្ពុជាឈានទៅសម្រេចបាននូវការគ្របដណ្តប់សុខភាពជាសកល ស្របតាម​ផែន​ការ​យុទ្ធ​សាស្រ្តបញ្ចកោណ នៃរាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លាសវៃ និងមុះមុត ប្រកប​ដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរា​ជាណា​ចក្រកម្ពុជា៕ អត្ថបទ រដ្ឋា