​បាល់ទាត់៖ ​ខ្សែប្រយុទ្ធ​ហូ​ឡង់ Memphis Depay បានធ្វើ​ដំណើរ​មកដល់ Barcelona ហើយ​នៅ​ថ្ងៃ​ចន្ទ​ម្សិលមិញ​ក្នុងការ​ផ្ទេរពី​ក្លិប​បារាំង Olympique Lyon ជាមួយនឹង​កិច្ចសន្យា ២ឆ្នាំ​។ អតីត​ខ្សែប្រយុទ្ធ​ក្រុម​បិសាច​ក្រហម Manchester United រូបនេះ​គឺជា​សមាជិក​សំខាន់​របស់​ក្រុម​ជំរើសជាតិ​ហូ​ឡង់​នៅ Euro ២០២០ ស៊ុត​បញ្ចូល​ទី​បាន ២គ្រាប់​។

​​អ្នកចាត់ការ Barcelona បច្ចុប្បន្ន​លោក Ronald Koeman ដែល​ធ្លាប់​ធ្វើការ​ជាមួយ Depay ពេល​លោក​នៅ​ដឹកនាំ​ក្រុម​ជំរើសជាតិ​ហូ​ឡង់​នោះបាន​និយាយថា ការនាំយក​កីឡាករ​វ័យ ២៧​ឆ្នាំ​រូបនេះ​មកកាន់ Nou Camp នឹងធ្វើ​ឱ្យ​តំបន់​ប្រយុទ្ធ​របស់ Barcelona កាន់តែ​រឹងមាំ​បូករួម​ទាំង​វត្តមាន​របស់ Lionel Messi និង Sergio Aguero ក៏ដូចជា Antoine Griezmann​។​ ​ចំណែក Memphis Depay បាន​និយាយ​ដែរ​ថា Barcelona ជា​ក្រុម​ដែលមាន​របៀប​លេង​គួរឱ្យ​ចាប់អារម្មណ៍ ត្រូវ​នឹង​របៀប​លេង​របស់គេ​។

សូម​បញ្ជាក់​ថា ​ការមកដល់​របស់ Memphis Depay មកកាន់ Barcelona គឺ​មិនមាន​ចំណាយ​លុយ​អ្វី​ឡើយ ​បន្ទាប់ពី​កិច្ចសន្យា​របស់​កីឡាករ​វ័យ ២៧ឆ្នាំ​រូបនេះ​អស់​សុពលភាព​ជាមួយ Lyon ក្រោយ​ចប់​រដូវ​កាល​មុន​។ ការបង្ហាញ​ខ្លួន​សរុប​ឱ្យ Lyon ១៣៩ប្រកួត​តាំងពី​ឆ្នាំ២០១៧ នោះ Depay រកបាន ៦៣គ្រាប់ ខណៈ​នៅ​ក្រុម​ជំរើសជាតិ​ហូ​ឡង់​ត្រូវបាន​កោះហៅ​ដំបូង​តាំងពី​ឆ្នាំ២០១៣ បង្ហាញខ្លួន​បានមក​ដល់ពេលនេះ ៦៨ប្រកួត​រកបាន ២៨គ្រាប់​៕

​អត្ថបទ​៖​នាង សុភា​វុ​ធ