តម្លៃស្បៀងអាហារនៅតំបន់ហ្កាហ្សាស្ទ្រីប បានជួបប្រទះការកើនឡើងយ៉ាងខ្លាំងបន្ទាប់ពីជម្លោះកំពុងបន្តរវាងប៉ាឡេស្ទីន និងអ៊ីស្រាអែល ដែលធ្វើឱ្យអ្នកស្រុកលំបាកកាន់តែខ្លាំង។
ចាប់តាំងពីការផ្ទុះឡើងនៃជម្លោះនេះ អ៊ីស្រាអែលបានអនុវត្តការបិទផ្លូវយ៉ាងទូលំទូលាយនៅលើតំបន់ហ្កាហ្សាស្ទ្រីប ដោយអនុញ្ញាតឱ្យមានឡានដឹកទំនិញមួយចំនួនតូចដែលដឹកជំនួយប៉ុណ្ណោះ ហើយនោះបណ្តាលឱ្យមានការខ្វះខាតការផ្គត់ផ្គង់យ៉ាងខ្លាំង និងការហក់ឡើងនៃតម្លៃក្នុងគ្រឿងផ្គត់ផ្គង់ជីវភាពមូលដ្ឋាន ដូចជាម្សៅមី និងស្ករជាដើម។
ស្ថានភាពមនុស្សធម៌នៅភាគខាងជើង ហ្កាហ្សាស្ទ្រីប កាន់តែអាក្រក់ទៅៗ ដោយសារកង្វះការផ្គត់ផ្គង់ស្បៀងអាហារ ដែលគំរាមកំហែងដល់អាយុជីវិតអ្នកស្រុករាប់សែននាក់។ នៅទីក្រុង ហ្កាហ្សា ជំនួយអាហារដែលផ្តល់ជូនឱ្យអ្នកស្រុកគឺមានការខ្វះខាតយ៉ាងខ្លាំងសម្រាប់បំពេញតម្រូវការដ៏លើសលប់របស់អ្នកស្រុក។ ប្រជាជនតម្រង់ជួរដើម្បីទិញបន្លែព្រៃ និងពងមាន់ស្អុយ ដែលធ្លាប់តែត្រូវបានដាក់ជាចំណីឱ្យសត្វចិញ្ចឹម។
តម្លៃម្សៅមីមួយគីឡូក្រាមបានឡើងថ្លៃចាប់ពីតិចជាង ១ ស្ហាកែល (០,២៧ ដុល្លារ) ដល់ ៥០ ស្ហាកែល (១៣,៦៥ ដុល្លារ) ហើយស្ករ ១ គីឡូក្រាមឡើងថ្លៃពី ៣,៥ ស្ហាកែល (ជិត ១ ដុល្លារអាមេរិក) ដល់ ៨០ស្ហាកែល (ច្រើនជាង ២១,៨ ដុល្លារ)។ តម្លៃដ៏ខ្ពស់កប់ពពកនេះ ធ្វើឱ្យប្រជាពលរដ្ឋដែលរងគ្រោះពីសង្រ្គាមរួចទៅហើយនោះ កាន់តែវេទនាបន្ថែមទៀត៕