អង្គភាពសេវាគ្រប់គ្រងពន្ធនាគារជាតិ (SNAI) បាននិយាយកាលពីថ្ងៃព្រហស្បតិ៍ថា អ្នកទោស៣នាក់បានស្លាប់ និង ៦ នាក់ផ្សេងទៀតបានរងរបួសនៅក្នុងកុបកម្មមួយនៅពន្ធនាគារតំបន់ហ្គាយ៉ាហ្គីល (Guayaquil) ជាពន្ធនាគារធំបំផុតទីពីររបស់ប្រទេសអេក្វាឌ័រ។
ទីភ្នាក់ងារ បាននិយាយនៅក្នុងសេចក្តីថ្លែងការណ៍ថា បន្ទាប់ពីការប៉ះទង្គិចគ្នារយៈពេល ៤ ម៉ោង កងកម្លាំងសន្តិសុខ បានគ្រប់គ្រងស្ថានភាពដោយប្រសិទ្ធភាព ដែលនិយាយសំដៅទៅលើនគរបាលជាតិនិងកងកម្លាំងប្រដាប់អាវុធ ទទួលបន្ទុកការពារពន្ធនាគារ។
មនុស្សម្នាក់ក្នុងចំណោមអ្នករងរបួស ត្រូវបានបញ្ជូនទៅព្យាបាលនៅមន្ទីរពេទ្យ ហើយ ៥ នាក់ផ្សេងទៀត ត្រូវបានបញ្ជូនទៅពន្ធនាគារវិញ បន្ទាប់ពីទទួលបានការយកចិត្តទុកដាក់ពីគ្រូពេទ្យ។
កងកម្លាំងសន្តិសុខ បាននិយាយនៅក្នុងសេចក្តីថ្លែងការណ៍ថា កុបកម្មនេះផ្តើមចេញពី ការបះបោរផ្ទៃក្នុងដោយក្រុមអ្នកទោស ប៉ុន្តែពុំបានផ្តល់ព័ត៌មានលម្អិតបន្ថែមនោះទេ។