នាយករដ្ឋមន្ត្រីជប៉ុនលោក ហ្វូមីអូ គីស៊ីដា ( Fumio Kishida) បានរំលឹកឡើងវិញកាលពីថ្ងៃព្រហស្បតិ៍ថា ការប្តេជ្ញាចិត្តរបស់ខ្លួនក្នុងការឆ្ពោះទៅរកកិច្ចប្រជុំកំពូលជាមួយលោក គីម ជុងអ៊ុន (Kim Jong Un) ជាមេដឹកនាំកូរ៉េខាងជើង ដើម្បីដឹងអំពីការវិលត្រឡប់មកវិញរបស់ប្រជាជនជប៉ុន ដែលត្រូវបានគេជឿថាត្រូវបានចាប់ពង្រត់ដោយភ្នាក់ងារកូរ៉េខាងជើង ក្នុងទសវត្សរ៍ឆ្នាំ ១៩៧០ និង ៨០។

លោកបានប្រាប់អ្នកយកព័ត៌មានថា៖«ខ្ញុំនៅតែប្តេជ្ញាចិត្តក្នុងការសម្រេចរឿងនេះសម្រាប់ប្រទេសជប៉ុន»  ខណៈបដិសេធមិននិយាយដោយផ្ទាល់នូវយោបល់ថ្មីៗពីកូរ៉េខាងជើង ដែលស្នើឲ្យមានកិច្ចប្រជុំបែបនេះនឹងអាចកើតមាន លុះត្រាតែជប៉ុន ឈប់សង្កត់ធ្ងន់លើបញ្ហាចាប់ពង្រត់នេះ។

ថ្លែងនៅក្នុងសន្និសីទសារព័ត៌មានមួយ បន្ទាប់ពីថវិការដ្ឋាភិបាល ត្រូវបានអនុម័តដោយសភា លោក គីស៊ីដា បានសង្កត់ធ្ងន់ថា លោកបានចូលរួមដោយផ្ទាល់នៅក្នុងការចរចាកម្រិតខ្ពស់ ដើម្បីដោះស្រាយបញ្ហាទ្វេភាគីនានា ចំពេលមានការព្រួយបារម្ភកាន់តែខ្លាំងឡើងអំពីកម្មវិធីមីស៊ីល និងអាវុធនុយក្លេអ៊ែររបស់ប្រទេសជិតខាង។

ក្នុងឆ្នាំ ២០០២ លោក គីម ជុងអ៊ីល ដែលជាឪពុកចុងរបស់លោក គីម ជុងអ៊ុន បានប្រាប់នាយករដ្ឋមន្ត្រី លោក Junichiro Koizumi ថា ភ្នាក់ងាររបស់ខ្លួន បានចាប់ពង្រត់ជនជាតិជប៉ុន ១៣នាក់ ក្នុងទសវត្សរ៍ឆ្នាំ១៩៧០ និង ៨០ ហើយបានអនុញ្ញាតឲ្យពួកគេ ៥នាក់ត្រឡប់ទៅប្រទេសជប៉ុនវិញ។

ជប៉ុនគិតថា មនុស្សរាប់រយនាក់ទៀត អាចត្រូវបានចាប់ពង្រត់ក្នុងអំឡុងពេលនោះ ហើយខ្លះនៅមាន   ជីវិត។ ដំណើរទស្សនកិច្ចលើកទីពីររបស់ លោក Koizumi ទៅកូរ៉េខាងជើង ក្នុងឆ្នាំ ២០០៤ គឺជាជំនួបកំពូលចុងក្រោយរវាងប្រទេសទាំងពីរ។