យោធាអាមេរិក បាននិយាយថា កងកម្លាំងសហរដ្ឋអាមេរិក បានបាញ់ទម្លាក់យានដ្រូនចំនួន៤គ្រឿងដែលបាញ់បង្ហោះដោយក្រុមហ៊ួទីក្នុងប្រទេសយេម៉ែន កាលពីថ្ងៃព្រហស្បតិ៍។
ទីបញ្ជាការកណ្តាលរបស់សហរដ្ឋអាមេរិក (CENTCOM) បាននិយាយនៅក្នុងសេចក្តីថ្លែងការណ៍មួយថា យានដ្រូនទាំងនេះ ត្រូវបានកំណត់គោលដៅទៅកាន់នាវាចម្រុះអាមេរិក-អង់គ្លេស និងនាវាចម្បាំងសហរដ្ឋអាមេរិក នៅសមុទ្រក្រហម ដោយបន្ថែមថា ឧបទ្ទវហេតុនេះ គឺជាថ្ងៃទីពីរនៃការវាយប្រហារលើនាវាកងទ័ពជើងទឹកអាមេរិក នៅក្នុងតំបន់នេះ។
ក្រុមចម្រុះ បានស្ទាក់ចាប់ និងបំផ្លាញយានដ្រូនចំនួន៤គ្រឿង ដែលហោះសំដៅលើនាវាចម្បាំងរបស់សហរដ្ឋអាមេរិកនៅក្នុងសមុទ្រក្រហម កាលពីថ្ងៃពុធ។
ចាប់តាំងពីខែវិច្ឆិកា ឆ្នាំ ២០២៣មក ក្រុមហ៊ួទី បានបើកការវាយប្រហារលើការដឹកជញ្ជូនពាណិជ្ជកម្មនៅ សមុទ្រក្រហម និងឈូងសមុទ្រ Aden ដើម្បីជាការសងសឹកចំពោះការវាយប្រហាររបស់អ៊ីស្រាអែល នៅតំបន់ហ្កាហ្សាស្ទ្រីប។
ជាការឆ្លើយតប សហរដ្ឋអាមេរិក និងអង់គ្លេស បានធ្វើការវាយប្រហារតាមផ្លូវអាកាស និងមីស៊ីលប្រឆាំងនឹងគោលដៅរបស់ក្រុមហ៊ួទីនៅក្នុងប្រទេសយេម៉ែន ចាប់តាំងពីពាក់កណ្តាលខែមករា ដែលនាំឲ្យមានការកើនឡើងនៃការវាយប្រហារដោយកងកម្លាំងហ៊ួទីទៅលើនាវាចម្បាំងអាមេរិក ឬអង់គ្លេស។
ក្រុមហ៊ុនដឹកជញ្ជូនជាច្រើនបានផ្លាស់ប្តូរផ្លូវ ដើម្បីជៀសវាងសមុទ្រក្រហម ដែលជាផ្លូវទឹកដ៏មមាញឹកបំផុតរបស់ពិភពលោក ដើម្បីទៅដល់គោលដៅនានា នៅអាហ្វ្រិក។