កាលពីថ្ងៃព្រហស្បតិ៍ម្សិលមិញ រដ្ឋាភិបាលសហរដ្ឋអាមេរិកបានផ្តល់ថវិកា ៦០លានដុល្លារដល់រដ្ឋ Maryland ដែលជាថវិការសង្រ្គោះបន្ទាន់សហព័ន្ធ ដើម្បីឆ្លើយតបនឹងការបាក់ស្ពាន Francis Scott Key នៅទីក្រុង Baltimore ។
លោក Wes Moore គឺជាអភិបាលរដ្ឋ Maryland បាននិយាយនៅក្នុងសន្និសីទសារព័ត៌មានថា ខ្ញុំអាចរាយការណ៍បានថា មកទល់នឹងរសៀលថ្ងៃនេះ រដ្ឋបាលរបស់លោក Biden និងលោកស្រី Harris បានឯកភាពលើសំណើរ ។
លោកបន្តថា ពួកយើងពិតជាមានការដឹងគុណយ៉ាងជ្រាលជ្រៅចំពោះលោកប្រធានាធិបតី Biden រដ្ឋមន្រ្តីក្រសួងដឹកជញ្ជូនលោក Pete Buttigieg គណៈប្រតិភូសហព័ន្ធរបស់ពួកយើង និងដៃគូសហព័ន្ធរបស់ពួកយើងទាំងអស់ ។
លោក Moore បានស្នើសុំថវិការសង្រ្គោះចំនួន ៦០លានដុល្លារកាលពីព្រឹកថ្ងៃព្រហស្បតិ៍ ហើយរដ្ឋបាលផ្លូវហាយវ៉េសហព័ន្ធនៃក្រសួងដឹកជញ្ជូនសហរដ្ឋអាមេរិក បានឯកភាពនឹងសំណើរមួយនេះ ត្រឹមរយៈពេលប៉ុន្មានម៉ោងប៉ុណ្ណោះ ។
គួរឲ្យដឹងថា កាលពីព្រឹកថ្ងៃអង្គារកន្លងទៅ ស្ពានដែលមានប្រវែង ១,៥ម៉ាយល៍នៅក្នុងរដ្ឋ Maryland បានបាក់ បន្ទាប់ពីនាវាដឹកទំនិញ ធ្វើដំណើរទៅកាន់ប្រទេសស្រីលង្កា បានបុកសសរស្ពានថ្មបេតុង ។ សាកសពមនុស្ស ២នាក់ ត្រូវបានស្រង់ និងមនុស្ស ៤នាក់ផ្សេងទៀត កំពុងបាត់ខ្លួនដែលគេសង្ស័យថាបានស្លាប់ ។
ដោយឡែក ប្រធានក្រុមហ៊ុនធានារ៉ាប់រងរបស់អង់គ្លេសបាននិយាយថា ការបាក់ស្ពាន Francis Scott Key នឹងបណ្តាលឲ្យមានការខាតបង់ធានារ៉ាប់រងលើសមុទ្រដ៍ធំធេងបំផុតមិនធ្លាប់មាន ។
ក្រុមអ្នកជំនាញនិយាយថា ការខូចខាតអាចមានតម្លៃដល់ទៅ ៣ ពាន់លានដុល្លារ ឬស្មើនឹង ២,៣ពាន់លានអឺរ៉ូ ៕