ទីភ្នាក់ងារការពារព្រំដែន និងគយសហរដ្ឋអាមេរិក(CBP) បានរៀបចំសន្និសីទសារព័ត៌មាននៅទីក្រុង Tucsonរដ្ឋ Arizonaកាលពីថ្ងៃព្រហស្បតិ៍ជាមួយអ្នកតំណាងមកពីម៉ិកស៊ិក ក្វាតេម៉ាឡា និងអេក្វាឌ័រ ដើម្បីពន្យល់ពីគ្រោះថ្នាក់នៃការឆ្លងកាត់ព្រំដែនសហរដ្ឋអាមេរិក-ម៉ិកស៊ិកនៅក្នុងខែរដូវក្តៅខាងមុខនេះ ។

លោក John Modlin ដែលជាភ្នាក់ងារល្បាត និយាយថា អ្នករាល់គ្នាត្រូវដឹងថា ចំនួនមនុស្សស្លាប់នៅទីនេះ ទំនងជាពុំធ្លាប់ដែលមានពីមុនមក ហើយជាថ្មីម្តងទៀត ពួកយើងប្រហែលជាមិនអាចដឹង ដោយសារតែពួកគេធ្វើដំណើរចេញពីព្រំដែនទៅកាន់តំបន់ដាច់ស្រយាលឆ្ងាយៗ ពួកយើងអាចនឹងមិនរកឃើញពួកគេរយៈរាប់ឆ្នាំ ។

យោងតាមការអះអាងរបស់ CBP បានឲ្យដឹងថា រយៈពេលជាង ១២ខែកន្លងមកនេះ ទីភ្នាក់ងាររបស់ពួកគេ បានចុះប្រតិបត្តិការរុករក និងជួយសង្រ្គោះចំនួន ១១០លើក ។

លោក Jose Muriente គឺជាអនុប្រធានក្រុមប្រតិបត្តិការអាកាសរបស់ CBP និយាយថា ការសង្រ្គោះតាមអាកាសធ្វើឡើងជាជម្រើសចុងក្រោយ ដោយសារតែវាមានហានិភ័យខ្ពស់ សម្រាប់ក្រុមការងារ និងអ្នកជំងឺរបស់ពួកយើង ។

ដោយឡែក លោក Barceló Durazo គឺជាអគ្គកុងស៊ុលនៃស្ថានកុងស៊ុលម៉ិកស៊ិកប្រចាំនៅទីក្រុង Tucson បានធ្វើការបញ្ជាក់ពីឥទ្ធិពលរបស់ព័ត៌មានសង្គម និងបណ្តាញទំនាក់ទំនងក្រៅផ្លូវការ លើទស្សនៈនៃការធ្វើដំណើររបស់ក្រុមជនអន្តោប្រវេសន៍ ។

លោកបានសង្កត់ធ្ងន់ពីសារៈសំខាន់នៃការផ្សព្វផ្សាយព័ត៌មានត្រឹមត្រូវ ដើម្បីប្រយុទ្ធប្រឆាំងនឹងការសាយភាយព័ត៌មានមិនពិតដោយក្រុមរត់ពន្ធមនុស្សខុសច្បាប់ ។

លោក Barceló និយាយថា ខ្ញុំគិតថា សម្រាប់រដ្ឋាភិបាល និងអង្គការដែលធ្វើការជាមួយជនអន្តោប្រវេសន៍ វាសំខាន់ណាស់ក្នុងការព្យាយាមផងដែរ ដើម្បីបង្ហាញសារទាំងអស់នេះ ៕