រុស្ស៊ី កាលពីថ្ងៃព្រហស្បតិ៍ បានអះអាងថា បានបំផ្លាញរថក្រោះអ៊ុយក្រែនអស់ជាច្រើនគ្រឿង ក្នុងនោះរួមមានរថក្រោះ១គ្រឿងផលិតនៅអាមេរិក ព្រមទាំងគ្រឿងយុទ្ធោបករណ៍ និងទីតាំងមួយចំនួនផងដែរ ខណ:ដែលអ៊ុយក្រែន បានបញ្ជាក់នៅថ្ងៃជាមួយគ្នាថា ខ្លួនបានវាយទប់ការវាយលុកជាច្រើនរបស់រុស្ស៊ីនិងបានចាប់ផ្ដើមវាយប្រហារលើសម្ភារៈសឹកជាច្រើនរបស់រុស្ស៊ី។
ក្រសួងការពារជាតិរុស្ស៊ី បាននិយាយកាលពីថ្ងៃព្រហស្បតិ៍ថា មួយថ្ងៃមុននេះ កងទ័ពរុស្ស៊ីបានវាយប្រហារកងទ័ពអ៊ុយក្រែនជាច្រើនមុខព្រួញ ដោយបានបំផ្លាញរថក្រោះ៥គ្រឿង ក្នុងនោះរួមមាន រថក្រោះអាប្រាម (Abram)១គ្រឿងផលិតនៅអាមេរិកព្រមទាំងរថពាសដែកដឹកបុគ្គលិកយោធាជាច្រើនគ្រឿង យានយន្ដប្រយុទ្ធថ្មើរជើង កាំភ្លើងផ្លោង និងឧបករណ៍ ហើយនិងសម្ភារៈសឹកផ្សេងទៀតផងដែរ។
កម្លាំងការពារដែនអាកាសរបស់រុស្ស៊ី បានបំផ្លាញយានដ្រូនអ៊ុយក្រែនចំនួន១៣១គ្រឿង និងបានបាញ់ទម្លាក់រ៉ូកែតអស់ជាច្រើនគ្រាប់។
អគ្គសេនាធិការកងទ័ពអ៊ុយក្រែន បានផ្សព្វផ្សាយរបាយការណ៍សមរភូមិមួយ នៅថ្ងៃជាមួយគ្នា ដោយបញ្ជាក់ថា ក្នុងរយ:ពេល២៤ម៉ោងកន្លងទៅនេះ ការប្រយុទ្ធ៤៨លើក បានកើតឡើងនៅតំបន់សមរភូមិជាច្រើន ហើយកងទ័ពអ៊ុយក្រែនបានវាយទប់ការវាយប្រហា២៩លើករបស់កងទ័ពរុស្ស៊ីនៅ៤មុខព្រុញក្នុងនោះរួមមាន ក្រុងបាក់មុតផងដែរ។
យោងតាមរបាយការណ៍បានឱ្យដឹងថា កងទ័ពអ៊ុយក្រែន ក៏បានធ្វើការវាយប្រហារជាច្រើនផងដែរលើកងទ័ពរុស្ស៊ី ដោយបានវាយប្រហាក្នុងតំបន់ដែលបុគ្គលិកយោធាកំពុងប្រមូលផ្ដុំ និងគ្រឿងយុទ្ធោបករណ៍ ប៉ុស្ដិបញ្ជាការ ឃ្លាំងគ្រាប់រំសេវ និងគ្រឿងយុទ្ធោបករណ៍ការពារដែនអាកាស ដោយកម្ទេចកាំភ្លើងធំរុស្ស៊ីបានពីរដើម និងមីស៊ីលកំណត់ទិស១ដើម៕