វីដេអូរបស់សាក្សីឃើញអគ្គិភ័យយ៉ាងសន្ធោសន្ធៅ កំពុងឆាបឆេះអគារខ្ពស់នៅទីក្រុង Recife ប្រទេសប្រេស៊ីលកាលពីយប់ថ្ងៃព្រហស្បតិ៍ ។ 

 ផ្សែងខ្មៅយ៉ាងក្រាស់ឃ្មឹកបានហុយពីលើបំណែកកម្ទេចកម្ទីធ្លាក់ពីលើអគារខ្ពស់ ដែលកំពុងស្ថិតក្រោមការសាងសង់ នៅសង្កាត់ Torre នៃទីក្រុង Recife រដ្ឋ Pernambucoប្រទេសប្រេស៊ីល ។ 

 សាក្សីដែលថតបានវីដេអូនេះ និងរស់នៅក្បែរទីនោះ និយាយថា អណ្តាតភ្លើងទំនងជាមិនរីករាលដាលឆាបឆេះដល់អគារជិតគ្នានោះទេ ប៉ុន្តែបំណែកកម្ទេចកម្ទី បានធ្លាក់លើការដ្ឋានសំណង់នៅខាងក្រោម ។ 

 យោងតាមសេចក្តីរាយការណ៍ពីសារព័ត៌មានក្នុងស្រុក បានឲ្យដឹងថា ភ្លាមៗនោះ ក្រុមការងារឆ្លើយតបសង្រ្គោះបន្ទាន់ បានប្រញាប់ប្រញាល់ទៅកាន់កន្លែងកើតហេតុ ខណៈដែលក្រុមអាជ្ញាធរ បានបិទចរន្តអគ្គិសនី និងជម្លៀសមនុស្សចេញពីអគារក្បែរគ្នា ដើម្បីជាការប្រុងប្រយ័ត្នទុកជាមុន ។ នៅពុំទាន់មានសេចក្តីរាយការណ៍ភ្លាមៗនោះទេពីគ្រោះថ្នាក់ ៕