ព្យុះ ការិយាល័យគ្រប់គ្រងគ្រោះមហន្តរាយរបស់ប្រទេស បាននិយាយកាលពីថ្ងៃសុក្រថា ព្យុះស៊ីក្លូនត្រូពិចដែលបានវាយបោកបក់នៅទូទាំងប្រទេសដីកោះម៉ាដាហ្គាស្កា ក្នុងសប្តាហ៍នេះ បណ្តាលឲ្យមនុស្សយ៉ាងហោចណាស់ ១៨នាក់ស្លាប់ និងរាប់ពាន់នាក់ទៀតជម្លៀសខ្លួនចេញពីលំនៅឋាន។

ការិយាល័យជាតិគ្រប់គ្រងហានិភ័យ និងគ្រោះមហន្តរាយ បាននិយាយនៅក្នុងរបាយការណ៍ថា ព្យុះស៊ីក្លូនត្រូពិច Gamane ដែលបានបក់ឆ្លងកាត់ភាគឦសានប្រទេសម៉ាដាហ្គាស្កា កាលពីថ្ងៃពុធ និងថ្ងៃព្រហស្បតិ៍ បានបណ្តាលឱ្យមនុស្សជាង ២០.០០០នាក់ជម្លៀសខ្លួនចេញពីលំនៅឋាន។ ការិយាល័យ បាននិយាយបន្ថែមថា មនុស្ស ៣ នាក់ផ្សេងទៀតបានរងរបួស និង ៤ នាក់នៅបាត់ខ្លួន។

ការិយាល័យជាតិគ្រប់គ្រងហានិភ័យ និងគ្រោះមហន្តរាយ និយាយថា ព្យុស៊ីក្លូន Gamane បានវាយបោកបក់ដល់ដីគោកនៅភាគខាងជើងទីក្រុង Vohémar នៅភាគឦសានប្រទេសម៉ាដាហ្គាស្កា កាលពីថ្ងៃពុធ ដោយមានល្បឿនខ្យល់ជាមធ្យម ១៥០គីឡូម៉ែត្រក្នុងមួយម៉ោង និងសន្ទុះខ្យល់ខ្លាំង ២១០គីឡូម៉ែត្រក្នុងមួយម៉ោង។ 

ព្យុះស៊ីក្លូន ដែលបាននាំមកនូវភ្លៀងធ្លាក់ខ្លាំង និងទឹកជំនន់ បានបណ្តាលឱ្យផ្លូវ និងស្ពាន បាក់រលំនៅភាគខាងជើងប្រទេសដីកោះម៉ាដាហ្គាស្កា។ ព្យុះស៊ីក្លូន Gamane គឺជាព្យុះដំបូងគេនៅឆ្នាំនេះ នៅក្នុងរដូវព្យុះស៊ីក្លូន និងព្យុះ នៅក្នុងប្រទេសម៉ាដាហ្គាស្កា។