អាមេរិក ៖ អភិបាលរដ្ឋ ម៉ារីលែន(Maryland) លោក Wes Moore បាននិយាយទៅកាន់អ្នកសារព័ត៌មាន កាលពីថ្ងៃសុក្រថា ដងស្ទូចនិងធនធានបន្ថែមជាច្រើន បានបញ្ជូនទៅកន្លែងកើតឧបទ្ទវហេតុ ដើម្បីចាប់ផ្តើមបោសសម្អាតបំណែកធំៗ ដែលបណ្តាលមកពីការបាក់ស្ពាន Francis Scott Key កាលពីដើមសប្តាហ៍នេះ។ ដងស្ទូច ដែលធ្វើប្រតិបត្តិការធំបំផុតនៅលើនាវា US Eastern Seaboard ដាក់នៅកំពង់ផែទីក្រុង Baltimore កាលពីថ្ងៃសុក្រ ដែលត្រៀមរួចជាស្រេចដើម្បីចាប់ផ្តើមការបោសសម្អាតបំណែកស្ពាន Francis Scott Key ប៉ុន្មានថ្ងៃបន្ទាប់ពីនាវាដឹកទំនិញមួយគ្រឿងបានបុកស្ពាននេះ ដោយបានបញ្ជូនបំណែកធ្លាក់ចូលទៅក្នុងកំពង់ផែ។

យោងតាមអ្នកនាំពាក្យឆ្មាំល្បាតឆ្នេរសហរដ្ឋអាមេរិក លោក Carmen Carver បាននិយាយថា ក្រុមនាវិក បានវាស់ស្ទង់ការខូចខាតកាលពីថ្ងៃសុក្រ។ ដងស្ទូចដែលអាចលើកបានទម្ងន់ដល់ទៅ ១.០០០តោន បានទៅដល់កាលពីល្ងាចថ្ងៃព្រហស្បតិ៍ ហើយប្រហែលជានឹងចាប់ផ្តើមស្ទូចយកបំណែកបាក់របស់ស្ពានចេញពីទឹកនៅព្រឹកថ្ងៃសៅរ៍នេះ។ ដងស្ទូចទីពីរកំពុងត្រូវបានបញ្ជូនទៅទីនោះ ហើយត្រូវបានរំពឹងថានឹងទៅដល់ក្នុងពេលឆាប់ៗនេះ ដើម្បីជួយដល់កិច្ចខិតខំប្រឹងប្រែងនេះ។ ការធ្វើចរាចរណ៍នាវាឆ្លងកាត់កំពង់ផែដ៏មមាញឹកនៅទីក្រុង Baltimore ត្រូវបានផ្អាកដោយគ្មានពេលកំណត់ ចាប់តាំងពីឧបទ្ទវហេតុនាវាដឹកទំនិញបុកស្ពាន Francis Scott Key បណ្តាលឲ្យបាក់ដ៏គួរឱ្យភ្ញាក់ផ្អើល ដោយបានឆក់យកជីវិតមនុស្ស ៦ នាក់ ដែលធ្វើការនៅក្នុងក្រុមជួសជុល។

ចរាចរណ៍ផ្លូវគោកក៏រងផលប៉ះពាល់ផងដែរ ដោយអ្នកបើកបររថយន្តរាប់ពាន់នាក់ក្នុងមួយថ្ងៃៗ ត្រូវបង្វែរទៅផ្លូវរូងក្រោមដីដែលមានការកកស្ទះរួចទៅហើយនៅក្រោមទីក្រុង។ ការងារបោសសម្អាតបំណែកដែករាប់តោនចេញពីទឹកទន្លេជ្រៅ Patapsco ត្រូវបានគេរំពឹងថានឹងមានភាពលំបាក និងគ្រោះថ្នាក់ ដោយសារតែសាកសពកម្មករ ៤នាក់ទៀត នៅមិនទាន់ត្រូវបានរកឃើញនៅឡើយ។ 

កម្មករបាត់ខ្លួនទាំងបួននាក់ ត្រូវបានគេជឿថាបានស្លាប់ នៅពេលនាវាដឹកកុងតឺន័រប្រវែង ៣០០ ម៉ែត្រ មានទង់ជាតិសិង្ហបុរី ឈ្មោះ Dali បានដាច់ចរន្តអគ្គិសនី ហើយបានបុកស្ពានកាលពីថ្ងៃអង្គារ។