កណ្តាល៖ នាព្រឹកថ្ងៃទី៣០ ខែមីនា ឆ្នាំ២០២៤ នេះ អ្នកឧកញ៉ាបណ្ឌិត ទ្រី ភាព ទីប្រឹក្សា​ផ្ទាល់​សម្តេច​អគ្គមហាសេនាបតីតេជោ ប្រធានគណបក្សប្រជាជនកម្ពុជា និងជា​អនុ​ប្រធាន​ក្រុម​ការងារ​គណបក្ស​ចុះមូលដ្ឋានស្រុកកណ្ដាលស្ទឹង បានអញ្ជើញជាអធិបតីក្នុងពិធីសំណេះសំណាល ជា​មួយ​មន្ត្រី​គណបក្សស្រុក-ឃុំ ចំនួន ១៨៨ រូប នៅទីស្នាក់ការគណបក្សស្រុកកណ្ដាលស្ទឹង។

ថ្លែងក្នុងពិធីនេះ អ្នកឧកញ៉ា បណ្ឌិត បានសំដែងនូវការកោតសរសើរ និង ថ្លែងអំណរ​គុណ​យ៉ាង​ជ្រាល​ជ្រៅ​ចំពោះ​មន្ត្រីគណបក្សស្រុក-ឃុំទាំងអស់ ដែលបានបោះឆ្នោត​ជ្រើស​តាំង​សមាជិក​ព្រឹទ្ធសភា នីតិកាលទី៥ កាលពីថ្ងៃអាទិត្យ ទី២៥ ខែកុម្ភៈ ឆ្នាំ២០២៤ ដោយទទួល​បាន​លទ្ធផល​យ៉ាង​ត្រចះ​ត្រចង់។

បន្ថែមលើនេះទៀត អ្នកឧកញ៉ា បណ្ឌិត បានបន្តថា ការបោះឆ្នោត​ជ្រើស​រើស​ក្រុម​ប្រឹក្សា​ស្រុក ក្រុមប្រឹក្សាខេត្តអណត្តិទី៤ ឆ្នាំ២០២៤ នឹងត្រូវបានធ្វើឡើង នៅថ្ងៃទី២៦ ខែ​ឧសភា ខាងមុខនេះហើយ។ ដូច្នេះ សូមមន្ត្រីគណបក្សស្រុក-ឃុំទាំងអស់បន្តរក្សាឆន្ទៈស្រឡាញ់ គាំទ្រ​គណបក្សប្រជាជន ដើម្បីឱ្យការបោះឆ្នោត ជ្រើសរើស ក្រុមប្រឹក្សាស្រុក ក្រុមប្រឹក្សា​ខេត្ត​អាណត្តិ​ទី៤ ខាងមុខនេះ ទទួលបាន​លទ្ធផល​ល្អ​ប្រសើរ​ដូច​កា​រ​បោះឆ្នោត​ជ្រើស​តាំង​សមាជិក​ព្រឹទ្ធ​សភា នីតិកាលទី៥ កន្លងទៅដែរ។ ជាចុងក្រោយ អ្នកឧកញ៉ា បណ្ឌិត បានបញ្ជូនដល់សមាជិក-សមាជិកា​ទាំងអស់ថា “ជោគជ័យរបស់គណបក្សប្រជាជនគឺដោយសារ ការឯកភាពផ្ទៃក្នុងដ៏រឹងមាំ និង​មានការគាំទ្រលើសលុបពីប្រជាពលរដ្ឋ”។

គួរ​កត់សម្គាល់ផងដែរថា ការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ គឺជា​ការ​បោះឆ្នោត​មួយក្នុងចំណោមការបោះឆ្នោតទាំង៤ នៅព្រះរាជាណាចក្រកម្ពុជា៕