កណ្ដាល ៖ ក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា គិតត្រឹមថ្ងៃទី២៩ ខែមីនា ឆ្នាំ២០២៤ កម្មករនិយោជិតនៃរោងចក្រ អ.ជី ហ្វ៊ូតវែរ (ខេមបូឌា) ឯ.ក ចំនួន ២,១៤៣នាក់ បានមកបើកប្រាក់ឈ្នួល និងប្រាក់បំណាច់ផ្សេងៗរបស់ខ្លួន នៅសាលាស្រុកអង្គស្នួល ខេត្តកណ្តាល។

​ក្នុងសេចក្តីប្រកាសព័ត៌មាន ស្តីពីការបើកប្រាក់ឈ្នួល និងប្រាក់បំណាច់ផ្សេងៗជូនកម្មករនិយោជិតនៃរោងចក្រស្បែកជើង អ.ជី ហ្វ៊ូតវែរ ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ការបើកប្រាក់ទាំងនេះ នឹងបន្តបើកផ្តល់ជាបន្តបន្ទាប់ទៀត នៅទីតាំងដដែល ចាប់ពីម៉ោង៨ព្រឹក ដល់ម៉ោង៥ល្ងាច។ ជាមួយនេះ ក្រសួងបានថ្លែងអំណរគុណយ៉ាងជ្រាលជ្រៅចំពោះម្ចាស់រោងចក្រដែលបានខិតខំស្វែងរកថវិកាមកបើកជូនកម្មករមុនថ្ងៃកំណត់។

 អ្នកស្រី កែវ ច័ន្ទលីដា ប្រធានរដ្ឋបាលរោងចក្រ បានឲ្យព័ត៌មាន ប៊ីធីវី ដឹងថា ការបើកប្រាក់ជូនកម្មករនិយោជិត ភាគីរោងចក្របានទូទាត់ស្របទៅតាមគោលការណ៍ច្បាប់ស្តីពីការងារ ដែលមាន៣ចំណុច ដូចជា៖ប្រាក់ឈ្នួលនៃប្រាក់ខែចុងក្រោយ , ប្រាក់ជួសការឈប់សម្រាប់ប្រចាំឆ្នាំដែលនៅសល់ និងប្រាក់បំណាច់បញ្ចប់កិច្ចសន្យាការងារ ៥%។ អ្នកស្រី បានឲ្យដឹងទៀតថា ក្នុងអំឡុងបើកប្រាក់ទាំងនេះ ទឹកមុខកម្មករនិយោជិតមានភាពសប្បាយរីករាយ ក្នុងការទទួលយក និងគិតអំពីការទូទាត់នេះ ដោយសាររោងចក្រធ្វើទៅតាមគោលការណ៍ច្បាប់ ទោះបីជាថៅកែជួបរឿងអកុសល ប៉ុន្តែគាត់ក៏នៅមានទំនួលខុសត្រូវ ដោយស្វះស្វែងរកថវិកាពីប្រភពផ្សេងៗដើម្បីបើកផ្តល់ជូនកម្មករ។

ក្រុមកម្មការិនី ដែលមកពីតំបន់ផ្សេងគ្នា បាននិយាយថា ដំណោះស្រាយដែលរោងចក្រ និងក្រសួងការងារដាក់ចេញមកនេះ គឺពិតជាល្អ មិនថាចំពោះរូបគាត់ប៉ុណ្ណោះទេ ពោលគឺគ្រប់កម្មករនិយោជិតផ្សេងៗទៀតនៅរោងចក្រនេះពិតជាសប្បាយរីករាយទទួលយកដំណោះស្រាយ ពីព្រោះបានមើលឃើញពីការខូចខាតមានសភាពធ្ងន់ធ្ងរ និងមិនអាចស្រោចស្រង់បាននោះទេ ជាពិសេសកម្មករទាំងអស់នៅរោងចក្រនេះ មានក្តីស្រលាញ់ និងអាណិតដល់ថៅកែរោងចក្រ ដែលតែងស្រលាញ់ និងយកចិត្តទុកដាក់ដល់កម្មករកន្លងមក។

កាលពីល្ងាចថ្ងៃទី១៨ ខែមីនា ឆ្នាំ២០២៤កន្លងទៅ រោងចក្រ អ.ជី ហ្វ៊ូតវែរ (ខេមបូឌា) ឯ.ក ជួបឧបទ្ទវហេតុអគ្គិភ័យភ័យឆេះរោងចក្រអស់ទាំងស្រុង ដែលមានទីតាំងស្ថិតនៅភូមិអណ្តូង ឃុំបែកចាន ស្រុកអង្គស្នួល ខេត្តកណ្តាល ក្នុងនោះមានកម្មករនិយោជិតធ្វើការចំនួន ២,២១៤នាក់៕

អត្ថបទ៖ ឈិត បូរ៉ាវី