ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំយុវជន និងកីឡា នៅព្រឹកថ្ងៃទី៣១ខែមីនានេះ បានអញ្ជើញចូលរួមជាអធិបតីក្នុងពិធីបើកសន្និបាតបូកសរុបការងារអប់រំ យុវជន និងកីឡា ឆ្នាំ២០២២-២០២៣ និងទិសដៅបន្តឆ្នាំសិក្សា ២០២៣-២០២៤ ស្ថិតនៅវិទ្យាស្ថានបច្ចេកវិទ្យាកម្ពុជា។ សន្និបាតរបស់ក្រសួងអប់រំ យុវជន និងកីឡា រៀបចំធ្វើឡើងចំនួន៣ថ្ងៃ ដោយចាប់ផ្តើមពីថ្ងៃទី៣១ខែមីនា ដល់ថ្ងៃទី០២ខែមេសា ឆ្នាំ២០២៤។

  ថ្លែងក្នុងពិធីបើកសន្និបាត ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ការៀបចំសន្និបាតនៅពេលនេះ ធ្វើឡើងក្នុងគោលបំណងពិនិត្យមើលឡើងវិញរួមគ្នាស្តីពី វឌ្ឍនភាពរបស់វិស័យអប់រំ យុវជន និងកីឡា ដែលសម្រេចបានក្នុងឆ្នាំកន្លងទៅ ក៍ដូចជាការលើកទិសដៅការងារសម្រាប់ឆ្នាំបន្តបន្ទាប់ និងជាឱកាសចាប់ផ្តើមដ៍ល្អមួយរបស់វិស័យអប់រំ យុវជន និងកីឡា ក្នុងការចូលរួមអនុវត្តយុទ្ធសាស្រ្តបញ្ចាកោណ ដំណាក់កាលទី១ ដែលរាជរដ្ឋាភិបាលកម្ពុជា នីតិកាលទី៧ នៃរដ្ឋសភា បានចាត់ទុកវិស័យអប់រំជាវិស័យអាទិភាពទី១ ឈានឆ្ពោះទៅអភិវឌ្ឍមូលធនមនុស្សប្រកបដោយចំណេះដឹង សមត្ថភាព ភាពច្នៃប្រឌិត ស្មារតីសហគ្រិនភាព នវានុវត្តន៍ និងក្រមសីលធម៌ខ្ពស់ ដើម្បីចូលរួមចំណែកដល់ការអភិវឌ្ឍសង្គម និងកំណើនសេដ្ឋកិច្ច ប្រកបដោយចីរភាព និងបរិយាបន្ន។

  ឯកឧត្តម ឧបនាយករដ្ឋមន្រ្តី បានបន្តទៀតថា ការកំណត់អាទិភាពសម្រាប់វិស័យអប់រំ យុវជន និងកីឡា ពិតជាបានគិតគូរគ្រប់ជ្រុងជ្រោយ ដោយឈរលើមូលដ្ឋាននៃការអនុវត្តកំណែទម្រង់អប់រំ ដែលបានដាក់ចេញជាបន្តបន្ទាប់ និងទទួលបាននូវលទ្ធផលជាច្រើនគួរជាទីមោទនៈ ទាំងផ្នែកបរិមាណវិស័យ និងគុណវិស័យ។ មកទល់ពេលនេះ មានសាលារៀនគ្រប់កម្រិតសិក្សា ស្ទើរតែគ្រប់ទីតាំងភូមិសាស្រ្តនៅទូទាំងប្រទេស ស្របតាមអនុសាសន៍ដ៍ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តីកម្ពុជា ក្នុងគោលដៅបង្ខិតសាលារៀនឱ្យនៅជិតលំនៅដ្ឋានរបស់ប្រជាជន។ ជាក់ស្តែក្នុងឆ្នាំសិក្សា២០២៣-២០២៤ សាលារៀនចំណេះទូទៅ និងមត្តេយ្យសិក្សាមានចំនួនជិត២ម៉ឺនកន្លែងនៅទូទាំងប្រទេសកម្ពុជា។

 កន្លងទៅ សម្តេចធិបតី ហ៊ុន ម៉ាណែត នាយកដ្ឋមន្រ្តីកម្ពុជា បានដាក់ចេញគន្លឹះសំខាន់ចំនួន៤ នៅក្នុងកិច្ចប្រជុំរបស់គណៈរដ្ឋមន្រ្តី នីតិកាលទី៧នៃរដ្ឋសភា ក្នុងគោលដៅពង្រឹងគុណភាពគ្រឹះស្ថានសិក្សារដ្ឋចាប់ពីថ្នាក់មតេយ្យសិក្សាដល់មធ្យមសិក្សា ដែលក្នុងនោះរួមមាន៖ទី១.ការពង្រឹងភិបាលកិច្ចសាលារៀន ទី២.ការពិនិត្យ កែសម្រួល និងរៀបចំកម្មវិធីសិក្សា ,និងសកម្មភាពក្រៅម៉ោងសិក្សាឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថសិស្ស ទី៣.ការយកចិត្តទុកដាក់លើសុខភាពរបស់សិស្ស និងទី៤.ការជំរុញ និងលើកទឹកចិត្តការចូលរួមរបស់មាតាបិតា អ្នកណាព្យាបាល និងសហគមន៍ក្នុងការអប់រំស្របតាមពាក្យស្លោក«ភាពជាដៃគូរដ្ឋ និងសហគមន៍ដើម្បីអប់រំ។ បន្ថែមពីលើនេះ ក្រសួងបានកំណត់អាទិភាពចំនួន៤បន្ថែមទៀតរួមមាន៖ទី១.ការអប់រំឌីជីថល ទី២.ការបង្កើតមជ្ឈមណ្ឌលឧត្តមភាពនៅគ្រឹះស្ថានឧត្តមសិក្សា ទី៣.ការកសាងប្រព័ន្ធ និងការអភិវឌ្ឍសមត្ថភាព និងទី៤.ការអភិវឌ្ឍការអប់រំកាយ និងកីឡា។ អត្ថបទ៖ទូច សោភ័ណ ​