ពោធិ៍សាត់៖ សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី៣១ ខែមីនា ឆ្នាំ២០២៤ បានអញ្ជើញជាអធិបតី ​ក្នុងពិធីសម្ពោធឆ្លងព្រះបទុមចេតិយ និងសមិទ្ធផលនានានៅវត្តមណីរតនារាម ស្ថិតក្នុងសង្កាត់រលាប ក្រុងពោធិ៍សាត់ ខេត្តពោធិ៍សាត់។ ​ក្នុងពិធីសម្ពោធឆ្លងព្រះបទុមចេតិយ និងសមិទ្ធផលនានានៅវត្តមណីរតនារាមនេះ សម្ដេចធិបតី មានប្រសាសន៍សំណេះសំណាល ​រួមមាន៖

- សម្តេចធិបតី ហ៊ុន ម៉ាណែត មានប្រសាសន៍ថា សាសនា និងវប្បធម៌ គឺសំខាន់ ខណៈសាសនា មានការផ្សាភ្ជាប់គ្នាជាមួយវប្បធម៌របស់កម្ពុជាតាំងពីយូរណាស់មកហើយ។

- សម្ដេចធិបតី ហ៊ុន ម៉ាណែត បញ្ជាក់ពាក់ព័ន្ធករណីពលរដ្ឋព្រួយបារម្ភរឿង «សង្ក្រាន្ត» នៅកម្ពុជា គឺកុំបារម្ភ រាជរដ្ឋាភិបាលតាំងពីអាណត្តិមុនៗរហូតដល់អាណត្តិនេះ មានការយកចិត្តទុកដាក់ខ្ពស់ណាស់ចំពោះបញ្ហាវប្បធម៌ប្រពៃណីខ្មែរនេះ។

- សម្ដេចធិបតី បានណែនាំដល់រដ្ឋបាលរាជធានីខេត្តបន្តប្រារព្ធពិធីសង្ក្រាន្តឆ្នាំថ្មី ក្នុងឆ្នាំនេះឱ្យកាន់តែធំថែមទៀត។

- សម្ដេចធិបតី ហ៊ុន ម៉ាណែត ណែនាំដល់ក្រសួងវប្បធម៌ និងភាគីពាក់ព័ន្ធរៀបចំដាក់បញ្ជូល «សង្រ្កាន្ត» និងក្រមាខ្មែរ ទៅក្នុងសម្បត្តិបេតិកភណ្ឌវប្បធម៌របស់ខ្មែរនៅអង្គការយូណេស្កូ ដូច្នេះសូមបងប្អូនប្រជាពលរដ្ឋខ្មែរកុំមានការបារម្ភលើរឿងនេះ។

- សម្ដេចធិបតី ហ៊ុន ម៉ាណែត បញ្ជាក់ជាថ្មីថា សូមបងប្អូនប្រជាពលរដ្ឋប្រើចុះនូវពិធីសង្ក្រាន្តឆ្នាំថ្មីនេះ គឺមិនខុសទេ ហើយគ្មានអ្នកណាយករបស់ខ្មែរនោះទេ ដូច្នេះបងប្អូនប្រជាពលរដ្ឋអញ្ជើញធ្វើពិធីសង្ក្រាន្តនេះនៅទូទាំងរាជធានីខេត្ត។

- សម្ដេចធិបតី ហ៊ុន ម៉ាណែត ណែនាំដល់បងប្អូនប្រជាពលរដ្ឋបើកបរដោយគោរពច្បាប់ ហើយប្រកាសផ្ដល់រង្វាន់ដល់អភិបាលខេត្ត ដែលអាចរក្សាបានមិនឱ្យមានករណីគ្រោះថ្នាក់ចរាចរណ៍រហូតដល់មានមនុស្សស្លាប់នៅតាមបណ្ដារាជធានីខេត្តទាំងនោះ។

- សម្ដេចធិបតី ហ៊ុន ម៉ាណែត បានដាក់បទបញ្ជាឱ្យធ្វើការអនុវត្តច្បាប់ឱ្យបានតឹងរ៉ឹងចំពោះបុគ្គលចូលមកទន្រ្ទានរុករានដីព្រៃរបស់រដ្ឋ និងផ្ដាំទៅមន្រ្ដីរាជការ និងកងកម្លាំប្រដាប់អាវុធគ្រប់លំដាប់ថ្នាក់កុំពាក់ព័ន្ធចំពោះករណីនេះ បើមិនដូច្នេះទេនឹងឈានដល់ការបញ្ចប់តួនាទី ឬក្របខណ្ឌពីមន្រ្ដីរាជការតែម្ដង។

- សម្ដេចធិបតី ហ៊ុន ម៉ាណែត បញ្ជាក់ឱ្យរក្សាចំណុចផ្លូវឡើងភ្នំ ១៥០០ ឬ ផ្លូវអន្ទង់អាំង ស្ថិតនៅស្រុកវាលវែង ខេត្តពោធិ៍សាត់ ដោយពិនិត្យឡើងវិញ និងធ្វើការថែរក្សាឱ្យបានល្អសម្រាប់អត្ថប្រយោជន៍រយៈពេលវែង។ សម្ដេចក៏បានបញ្ជាក់ឱ្យពិនិត្យឡើងវិញ និងកែសម្រួលការអភិវឌ្ឍ តំបន់នេះដើម្បីអភិរក្សជាតំបន់ទេសចរណ៍ធម្មជាតិសម្រាប់ប្រជាពលរដ្ឋពីបច្ចុប្បន្នរហូតតទៅជំនាន់ក្រោយទៀត។

- សម្ដេចធិបតី បញ្ជាឱ្យក្រុមការងារអន្តរក្រសួង ត្រូវចុះពិនិត្យ និងចុះដោះស្រាយនៅតំបន់នេះ ដើម្បីថែរក្សា តំបន់ផ្លូវឡើងភ្នំ ១៥០០ ឬ ផ្លូវអន្ទង់អាំងនេះជាតំបន់ទេសចរណ៍ធម្មជាតិ។

- សម្ដេចធិបតី ហ៊ុន ម៉ាណែត បញ្ជាក់ថា ការអភិរក្ស សាសនា វប្បធម៌ ទឹកដី ព្រៃឈើ គឺដើម្បីធានាការអភិវឌ្ឍរបស់កម្ពុជាប្រកបដោយចីរភាព ដូច្នេះរាជរដ្ឋាភិបាលបានយកចិត្តទុកដាក់លើការងារទាំងនេះគ្រប់ពេលវេលា។