នាយកដ្ឋានពិធីការរបស់ក្រសួងការបរទេសរុស្ស៊ីបាននិយាយថា ក្រុមឯកអគ្គរដ្ឋទូតមកពីប្រទេសជាច្រើនបានចូលរួមក្នុងពិធីមួយកាលពីថ្ងៃសៅរ៍ (៣០ មីនា) ដើម្បីរំលឹកដល់វិញ្ញាណក្ខន្ធជនរងគ្រោះក្នុងការវាយប្រហារនៅសាលប្រគុំតន្ត្រីក្នុងខែនេះនៅជិតទីក្រុងមូស្គូ ដែលបានបណ្តាលឱ្យមនុស្សជាង ១៤០ នាក់បានស្លាប់។

ក្រុមខ្មាន់កាំភ្លើងបានបើកការបាញ់ប្រហារដោយអាវុធស្វ័យប្រវត្តិទៅកាន់អ្នកចូលរួមការប្រគុំតន្ត្រីកាលពីថ្ងៃទី ២២ ខែមីនា ក្នុងការវាយប្រហារដ៏អាក្រក់បំផុតក្នុងប្រទេសរុស្ស៊ី ក្នុងរយៈពេលពីរទសវត្សរ៍ ដែលបានបណ្តាលឲ្យមនុស្សយ៉ាងហោចណាស់ ១៤៤ នាក់បានស្លាប់។

សារព័ត៌មាន ខូមមឺសាន់ (Kommersant) បានរាយការណ៍ថា ក្នុងចំណោមនោះមានប្រធាន និងបុគ្គលិកនៃបេសកកម្មការទូតជាង ១៣០ ប្រទេស ដែលមានជាង ២៥០ នាក់បានចូល ហើយរួមមានឯកអគ្គរដ្ឋទូតមកពីសហរដ្ឋអាមេរិក សហភាពអឺរ៉ុប អាហ្រ្វិក អាមេរិកឡាទីន ក៏ដូចជាតំណាងអង្គការសហប្រជាជាតិ និងអង្គការផ្សេងៗទៀត។

ក្រុមរដ្ឋឥស្លាមបានអះអាងទទួលខុសត្រូវចំពោះការវាយប្រហារនេះ ហើយក្រុមមន្ត្រីសហរដ្ឋអាមេរិកនិយាយថា ពួកគេមានការស៊ើបការណ៍ចារកម្មសម្ងាត់ដែលបង្ហាញថាការវាប្រហារត្រូវបានធ្វើឡើងដោយសាខារបស់បណ្តាញរដ្ឋអ៊ីស្លាម ខូរ៉ាសាន (Khorasan) ឬហៅថា ISIS-K។

ប៉ុន្តែរុស្ស៊ី បាននិយាយតាំងពីដើមដំបូងថា ខ្លួនជឿជាក់ថាអ៊ុយក្រែនមានទំនាក់ទំនងនឹងការវាយប្រហារនេះ បើទោះបីជាទីក្រុង គីវ បានបដិសេធក៏ដោយ៕