បណ្ដាទីភ្នាក់ងារអង្គការសហប្រជាជាតិជាច្រើនកាលពីថ្ងៃសៅរ៍ (៣០ មីនា) បានអំពាវនាវឱ្យមានបទឈប់បាញ់ជាបន្ទាន់នៅក្នុងតំបន់ហ្កាហ្សា ដើម្បីសង្គ្រោះជីវិតពលរដ្ឋស្លូតត្រង់ ខណៈដែលចំនួនអ្នកស្លាប់របស់ប៉ាឡេស្ទីន ពីជម្លោះដែលកំពុងបន្តនេះបានកើនឡើងដល់ជាង ៣២.៧០០ នាក់។

ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយកាលពីថ្ងៃសៅរ៍ថា ក្នុងអំឡុងពេល ២៤ ម៉ោងកន្លងមកនោះ កងទ័ពអ៊ីស្រាអែលបានសម្លាប់មនុស្សចំនួន ៨២ នាក់ និងបានបង្ករបួសចំនួន ៩៨ នាក់ទៀតនៅក្នុងតំបន់ឆ្នេរហ៊ុមព័ទ្ធប៉ាឡេស្ទីនមួយនេះ។ នេះនាំឱ្យចំនួនអ្នកស្លាប់សរុបកើនដល់ ៣២.៧០៥ នាក់ និងអ្នករបួសដល់ទៅ ៧៥.១៩០ នាក់ ចាប់តាំងពីជម្លោះអ៊ីស្រាអែល និងក្រុមហាម៉ាសបានផ្ទុះឡើងកាលពីថ្ងៃទី០៧ ខែតុលា ឆ្នាំ ២០២៣ មក។

កាលពីថ្ងៃសៅរ៍ អង្គការអន្តរជាតិជាច្រើនដែលជាទីភ្នាក់ងាររបស់ UN បានអំពាវនាវជាថ្មីម្តងទៀតឱ្យមានការឈប់បាញ់ជាបន្ទាន់នៅក្នុងតំបន់ហ្កាហ្សា ដើម្បីជួយសង្គ្រោះជីវិតប្រជាជនក្នុងតំបន់នេះ និងផ្តល់ជំនួយមនុស្សធម៌ចាំបាច់ដល់ប្រជាជនដែលត្រូវការជំនួយ។

អ៊ីស្រាអែល បានបើកការវាយលុកទ្រង់ទ្រាយធំប្រឆាំងនឹងក្រុមហាម៉ាស នៅតំបន់ហ្កាហ្សាស្ទ្រីប ដើម្បីសងសឹកនឹងការវាយលុករបស់ក្រុមហាម៉ាស នៅភាគខាងត្បូងអ៊ីស្រាអែល កាលពីថ្ងៃទី០៧ ខែតុលា ឆ្នាំ២០២៣ ក្នុងអំឡុងពេលដែលមនុស្សប្រហែល ១.២០០ នាក់ត្រូវបានសម្លាប់ និងមនុស្សជាង ២៥០ នាក់ត្រូវបានចាប់ធ្វើជាចំណាប់ថ្នូរ៕