កំពង់ឆ្នាំង៖ តាមប្រភពសុំមិនបញ្ចេញឈ្មោះបានអោយដឹងថា ជនសង្ស័យ២នាក់ ត្រូវបាន​រដ្ឋបាល​ខេត្ត​កំពង់ឆ្នាំង អយ្យការសាលាដំបូងខេត្ត និងមន្ទីរកសិកម្មខេត្ត បញ្ជូន​ខ្លួន​ទៅ​អង្គភាព​ប្រឆាំង​អំពើ​ពុករលួយកាលពីថ្ងៃទី៣០ ខែមីនា ឆ្នាំ២០២៤ ក្រោយពីពួក​គេ​បាន​ចូល​ទៅ​ឈូស​បំផ្លាញ​ព្រៃលិចទឹកនៅចំណុចបឹងតាទុំ ស្ថិតក្នុងកង្កែប ឃុំច្រណូក ស្រុកកំពង់លែង ខេត្តកំពង់​ឆ្នាំង អស់ប្រមាណ៤ហិកតា។

ប្រភពដដែលបានបន្តថា ជនសង្ស័យទាំង២នាក់ដែលបានឃាត់ខ្លួន និងបញ្ជូនបន្តទៅអង្គភាព​ប្រឆាំង​អំពើ​ពុក​រលួយនោះ រួម​មានឈ្មោះ លឹម ដានីន ជាប្រធាន​ការិយាល័យ​ប្រជាពលរដ្ឋ​ស្រុក​កំពង់លែង​(ជាអ្នកលក់ដី) និងឈ្មោះ ជួន តុំ ជាអ្នករកស៊ីដី(ទិញដី)នៅក្នុងស្រុកកំពង់លែង។ ជនសង្ស័យទាំង២នាក់នោះបានឈូសឆាយដីព្រៃលិចទឹក និងបានបំផ្លាញព្រៃលិច​ទឹក​ប្រមាណ​៤ហិក​តា​ចាប់​ពីថ្ងៃទី២២ រហូតដល់ថ្ងៃទី២៧ ខែមីនា ឆ្នាំ២០២៤។ ជនសង្ស័យទាំង២នាក់ ត្រូវ​បានកម្លាំងចម្រុះឃាត់ខ្លួនយកមកសួរនាំនៅខ័ណ្ឌរដ្ឋបាលជលផលតាំងពីថ្ងៃទី២៧ ខែមីនា ឆ្នាំ​២០២៤ និងបានបញ្ជូនទៅអង្គភាពប្រឆាំងអំពើពុករលួយនៅថ្ងៃទី៣០ ខែមីនា ឆ្នាំ២០២៤ ដើម្បី​បន្ត​នីតិ​វិធី រកអ្នកពាក់ព័ន្ធ និងអ្នកនៅពីក្រោយរឿងនេះ។

តាមប្រភពព័ត៌មានបានបន្ថែមថា តាមចម្លើយសារភាពរបស់ជនសង្ស័យទាំង២នាក់ គឺមាន​មនុស្ស​នៅ​ក្នុង​ខេត្តកំពង់ឆ្នាំង​ប្រមាណ​ជាង​១០នាក់​ទៀត​ដែល​ជាប់​ពាក់ព័ន្ធ​នឹង​ការ​ឈូស​ទន្ទ្រាន​ព្រៃ​លិច​ទឹក​ក្នុង​ស្រុកកំពង់លែង៕ កាំង ហុងវាស្នា