ខេត្តពោធិ៍សាត់៖ ប្រជាពលរដ្ឋ និងក្រុមការងារគណបក្សប្រជាជនកម្ពុជាចុះជួយមូលដ្ឋាន​ឃុំត្រពាំងជង ស្រុកបាកាន បានរៀបចំធ្វើពិធីបុណ្យកត្តញ្ញុរួមគ្នា ជូនដល់លោកយាយលោកតា ចាស់​ព្រឹទ្ធាចារ្យ មានអាយុចាប់ពី៧០ឆ្នាំឡើងប្រមាណជិត១០០០នាក់ ។ ពិធីបុណ្យនេះត្រូវបានរៀបចំធ្វើនៅក្នុងបរិវេណ វត្តបាកាន ស្ថិតក្នុងឃុំត្រពាំងជង ស្រុកបាកាន ក្រោមអធិបតីភាព ឯកឧត្តម ទី នរិន្ទ ប្រធានក្រុមការងារចុះជួយមូលដ្ឋានស្រុកបាកាន និង​ដោយ​មាន​ការ​ចូលរួមពីកូនចៅសាច់ញាត្តិអមដំណើរលោកយាយលោកតាចាស់ព្រឹទ្ធាចារ្យ និង​សមាជិក​ក្រុម​ប្រឹក្សា​ឃុំ អាជ្ញាធរភូមិ-ឃុំ សរុបអ្នកចូលរួមទាំងអស់ប្រមាណជិត២០០០នាក់ ។

ឯកឧត្ដម អ៊ឹង ឌីប៉ូឡា ប្រធានក្រុមការងារចុះជួយឃុំត្រពាំងជង បានឲ្យដឹងថា លោក​យាយ​លោកតា ចាស់ព្រឹទ្ធាចារ្យ​មានអាយុចាប់ពី៧០ឆ្នាំឡើង ដែលបានអញ្ជើញចូលរួម​ក្នុង​ពិធី​បុណ្យ​នេះ​សរុប​ចំនួន៩៦៧នាក់ មកពីតាមបណ្តាភូមិទាំង២០ក្នុងឃុំត្រពាំងជង ក្នុងនោះមាន​លោក​តា​ចំនួ​ន​៣៥៧នាក់ និង លោកយាយមានចំនួន៦១០នាក់ ។ ពិធីបុណ្យនេះត្រូវបានប្រារព្ធឡើងស្របតាមបែបបទព្រះពុទ្ធសាសនា និងប្រពៃណីខ្មែរ ដោយ​មាន​ការ​និមន្តព្រះសង្ឃធ្វើកិច្ចកត្តញ្ញូរ កត្តវេទី វាងកូនចៅ និងលោកយាយលោកតាចាស់ព្រឹទ្ធាចារ្យ ហើយ​ព្រះសង្ឃធ្វើពិធីប្រោះព្រំ។ ក្នុងនោះដែរក្រុមការងារចុះជួយមូលដ្ឋានឃុំត្រពាំងជង ក៏​បាន​រៀប​ចំ​ជាថវិកា និងសម្ភារៈរួមមាន ខោអាវសម្រាប់មនុស្សចាស់ ស្បែកជើង នំបង្អែម ទឹកក្រូច ទឹក​សុទ្ធ ព្រមទាំងបានផ្តិតរូបថតដាក់ស៊ុម ដើម្បីឲ្យកូនចៅ ជូន​ដល់​លោក​យាយ​លោក​តាចាស់​ព្រឹទ្ធាចារ្យ​ទាំង៩៦៧នាក់ផងដែរ ។

ក្នុងឱកាសនោះ ឯកឧត្តម ទី នរិន្ទ មានប្រសាសន៍លើកឡើងថា ការរៀបចំ​ពិធី​បុណ្យ​បុណ្យ​កត្តញ្ញុ​រួមគ្នា ជូនដល់លោកយាយលោកតា ចាស់ព្រឹទ្ធាចារ្យ ដែលមានអាយុចាប់ពី៧០ឆ្នាំ​ឡើង​ក្នុង​ពេល​នេះ​គឺ ក្រោមគំនិតផ្តួចផ្តើមរបស់ឯកឧត្តម កែវ រតនៈ ប្រធាន​ក្រុម​ការងារ​ចុះ​ជួយ​មូលដ្ឋាន​ខេត្ត​ពោធិ៍សាត់។ ក្នុងគោលបំណង គឺដើម្បីជាការដឹងគុណចំពោះចាស់ព្រឹទ្ធាចារ្យ ដែលជាធនធាន​មនុស្ស​ដ៏​មានតម្លៃ ដោយបានផ្តល់ដំបូន្មានមានល្អៗ និងសំបូរទៅដោយ​បទ​ពិសោធន៍​ព្រម​ទាំង​ស្នាដៃ​រាប់​មិនអស់ក្នុងសង្គម ដល់កូនចៅគ្រប់ជំនាន់ ជាពិសេសកម្មវិធីបុណ្យនេះ ជាសារ​ក្រើន​រំលឹក​ដល់​កូនចៅ និងយុវជនជំនាន់ក្រោយឲ្យយល់ច្បាស់ពីគុណមាតាបិតា កុំឲ្យភ្លើតភ្លើន​រមិល​គុណ​មាតាបិតា​ដែល​ជាព្រះរស់ ហើយជាការចូល​រួម​ថែ​រក្សា​ការពារ​នូវ​តម្លៃ​ប្រពៃណី​វប្បធម៌​ខ្មែរ​ពី​បុរាណ​ដល់​កូនចៅជំនាន់ក្រោយៗ ជាពិសេសគឺកំឡុងពេលរដូវចូលឆ្នាំខ្មែរ ។ ឯកឧត្តម ទី នរិន្ទ បាន​បន្តថាប្រសិនបើបងប្អូនប្រជាពលរដ្ឋក្នុងឃុំត្រពាំងជង មានការ​គ្រាំទ្រ​ក្រុម​ការងារ​នឹង​រៀប​ចំ​ពិធី​បុណ្យ​នេះនៅឆ្នាំក្រោយៗទៀត។ បច្ចុប្បន្នក្រុមការងារតាមឃុំទាំង៩ក្នុងស្រុកបាកាន កំពុង​រៀប​ចំ​ធ្វើ​ពិធី​បុណ្យនេះ ជាបន្តបន្ទាប់ឲ្យបានមុនពេលបុណ្យចូលឆ្នាំខ្មែរចូលមកដល់៕ អត្ថបទ និង រូបភាព ៖ ភិរុណ ពៅ