ក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា នៅថ្ងៃទី១ ខែមេសា ឆ្នាំ២០២៤នេះ រោង​ចក្រ អ.ជី ហ្វ៊ូតវែរ (ខេមបូឌា) ឯ.ក បានបន្តការទូទាត់ប្រាក់ឈ្នួល និងប្រាក់​បំណាច់​ផ្សេងៗ​ជូន​កម្មករនិយោជិតបន្ថែមទៀត ខណៈគិតត្រឹមថ្ងៃទី៣០ ខែមីនាកន្លងទៅ នៅ​សល់​កម្មករ​និយោជិត​ចំនួន ១៩ នាក់ទៀតប៉ុណ្ណោះនៃចំនួនសរុប ២,២១៤ នាក់ដែលមិនទាន់បាន​ទូទាត់​ប្រាក់​ឈ្នួល​រួចរាល់។

ក្រសួងការងារ និងបណ្តុះបណ្តាលវិជ្ជាជីវៈ បានរម្លឹកដល់​កម្មករ​និយោជិតទាំ​ង​អស់​ដែល​មិន​ទាន់​បាន​មក​បើក​ប្រាក់ទាំងនេះ ត្រូវរួសរាន់មកបើកឲ្យបានគ្រប់ៗគ្នា ដោយយក​ឯកសារ​ពាក់ព័ន្ធ​មក​ជាមួយ ដូចជាអត្តសញ្ញាណប័ណ្ណ ឬលិខិតឆ្លងដែន និងប័ណ្ណសម្គាល់ខ្លួនជាដើម នៅ​រៀង​រាល់​ម៉ោង​ធ្វើការ នៅទីស្តីការក្រសួងការងារ។

សូមបញ្ជាក់ថា ការបើកប្រាក់ប្រាក់ឈ្នួល និងប្រាក់បំណាច់ផ្សេងៗជូនកម្មករនិយោជិត នៃ​រោង​ចក្រ​ស្បែក​ជើង អ.ជី ហ្វ៊ូតវែបានផ្អែកលើគោលការណ៍ច្បាប់កំណត់ចំនួន ៣ចំណុច ដូចជា៖​ប្រាក់​ឈ្នួល​នៃ​ប្រាក់​ខែចុងក្រោយ , ប្រាក់ជួសការឈប់សម្រាប់ប្រចាំឆ្នាំដែលនៅសល់ និងប្រាក់​បំណាច់​បញ្ចប់​កិច្ច​សន្យាការងារ។

គួររម្លឹកទៀតថា កាលពីល្ងាចថ្ងៃទី១៨ ខែមីនា ឆ្នាំ២០២៤ កន្លងទៅ រោងចក្រ អ.ជី ហ្វ៊ូតវែរ (ខេមបូឌា) ឯ.ក ជួបឧបទ្ទវហេតុអគ្គិភ័យភ័យឆេះរោងចក្រអស់ទាំងស្រុង ដែល​មាន​ទីតាំង​ស្ថិត​នៅ​ភូមិ​អណ្តូង ឃុំបែកចាន ស្រុកអង្គស្នួល ខេត្តកណ្តាល៕ អត្ថបទ៖ ឈិត បូរ៉ាវី