ចាប់ផ្ដើមពីថ្ងៃទី ១ ខែមេសា ឆ្នាំ ២០២៤នេះ មន្ត្រីសង្កាត់ ក៏ដូចជាក្រុមការងារ​មូលនិធិ​ជាតិ​ជំនួយ​សង្គម​ បានចាប់ផ្ដើមចុះទៅតាមភូមិឋានដោយផ្ទាល់ ដើម្បីចុះឈ្មោះគ្រួសារ​ក្រីក្រដែល​មាន​បណ្ណ​សមធម៌ ចូលទៅក្នុងកម្មវិធីជំនួយសង្គមថ្មី គឺកម្មវិធី «កញ្ចប់គ្រួសារ»។

ជាដំណាក់កាលដំបូងនេះ មន្ត្រីសង្កាត់ដែលទទួលបានការបណ្ដុះបណ្ដាលរួចរាល់ និង​មាន​ការ​ចូល​រួមពីមន្ត្រីមូលនិធិជាតិជំនួយសង្គម បានចាប់ផ្ដើមយុទ្ធនាការ ដោយចុះទៅតាមភូមិឋាន ដើម្បី​ចុះ​ឈ្មោះគ្រួសារក្រីក្រឱ្យចូលទៅក្នុងកម្មវិធីជំនួយសង្គមថ្មី គឺកម្មវិធី«កញ្ចប់គ្រួសារ»។ ការចុះឈ្មោះនៅតាមភូមិនេះ ធ្វើឡើងចាប់ពីថ្ងៃទី ១ រហូតដល់ថ្ងៃទី ២០ ខែមេសា។ ក្រោយថ្ងៃទី ២០ខែ មេសា គ្រួសារក្រីក្រ ដែលមិនទាន់បានចុះឈ្មោះ អាចបន្ត​ទៅ​ចុះ​ឈ្មោះនៅ​តាម​សង្កាត់​ដោយ​ផ្ទាល់​។

កម្មវិធីជំនួយសង្គម «កញ្ចប់គ្រួសារ» នេះ ជាកម្មវិធីថ្មី ដែលរាជរដ្ឋាភិបាល​សម្រេច​ឱ្យ​អនុវត្ត​ចាប់​ពីខែមេសា ឆ្នាំ២០២៤នេះ។ កម្មវិធីនេះ ជាកម្មវិធីមានលក្ខណៈអចិន្ត្រៃយ៍ គ្រប់ជ្រុងជ្រោយ ហើយ​វា​ជា​កម្មវិធីដែលចូលមកជំនួស កម្មវិធីឧបត្ថម្ភសាច់​ប្រាក់​ជូន​គ្រួសារ​ក្រីក្រ​កំឡុង​ពេល​ប្រយុទ្ធ​ប្រឆាំង​កូវីដ-១៩ ដែលរាជរដ្ឋាភិបាលបានអនុវត្តតាំងពីឆ្នាំ ២០២០ និងទើបបិទ​បញ្ចប់​នៅ​ខែ​មីនា ឆ្នាំ២០២៤នេះ។

ការចុះឈ្មោះចូលកម្មវិធីថ្មីនេះ តាមសេចក្ដីជូនដំណឹង គឺតម្រូវឱ្យមេគ្រួសារ ឬតំណាងគ្រួសារ ត្រូវ​មាន​បណ្ណ​សមធម៌ដែលមានសុពលភាពជាច្បាប់ដើម និងអត្តសញ្ញាណប័ណ្ណសញ្ជាតិខ្មែរ។ ចំពោះ​ជន​មាន​ពិការភាព ត្រូវភ្ជាប់បន្ថែមនូវ បណ្ណសម្គាល់ជនមានពិការភាពជាច្បាប់ដើមផងដែរ។ រី​ឯ​ចាស់​ជរា ដែលមានអាយុចាប់ពី ៦០ឆ្នាំ ឡើងទៅ ត្រូវភ្ជាប់បន្ថែមអត្តសញ្ញាណប័ណ្ណសញ្ជាតិខ្មែរ សំបុត្រ​កំណើត ឬសំបុត្របញ្ជាក់កំណើត។ ចំពោះក្រុមគោលដៅ ជាអ្នកផ្ទុកមេរោគអេដស៍ និង​ជំងឺ​អេដស៍ ត្រូវបានចុះឈ្មោះដោយស្វ័យប្រវត្តិ តាមរយៈការផ្ដល់ព័ត៌មានពីមេគ្រួសារ។

សម្រាប់​គ្រួសារក្រីក្រ ដែលបានទៅចុះឈ្មោះនៅថ្ងៃដំបូងនេះ ពួកគេ​បាន​បង្ហាញ​ជា​ការ​ដឹង​គុណ​ជា​ខ្លាំង​ ដែលរាជរដ្ឋាភិបាលនៅតែបន្តជួយ និងគិតគូដល់ពួកគេដែលមានជីវភាពខ្វះខាត។ ពួក​គេ​សប្បាយ​ចិត្ត ដែលរាជរដ្ឋាភិបាលសម្រេចអនុវត្តកម្មវិធីជំនួយសង្គមថ្មីមួយទៀតភ្លាមៗ សម្រាប់​ជួយ​ពួក​គេ ក្រោយកម្មវិធីឧបត្ថម្ភសាច់ប្រាក់ជូនគ្រួសារក្រីក្រ កំឡុងពេលប្រយុទ្ធប្រឆាំងកូវីដ-១៩ ត្រូវ​បាន​បិទបញ្ចប់។

សូម​ជម្រាបថា កម្មវិធី «កញ្ចប់គ្រួសារ» ជាការធ្វើសមហរណកម្ម ៤កម្មវិធីរួមគ្នា។ កម្មវិធីទី ១ គឺ​កម្ម​វិធី​ឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ។ កម្មវិធីទី ២ គឺ​កម្ម​វិធី​អាហារូករណ៍​សិស្សក្រីក្រថ្នាក់បឋម និងមធ្យម។ កម្មវិធីទី៣ គឺកម្មវិធី​ឧបត្ថម្ភ​សាច់​ប្រាក់​ជូន​ជន​មាន​ពិការ​ភាព និងកម្មវិធីទី ៤ គឺកម្មវិធីឧបត្ថម្ភសាច់ប្រាក់ជូនចាស់ជរាមានវ័យចាប់ពី ៦០​ឡើង​ទៅ៕ អត្ថបទ៖ គឹមហុក