បាល់ទាត់៖ ទីបំផុតក្រុមណាហ្គាវើលដ៏ បានបំបែកកំណត់ត្រាមិនស្គាល់ឈ្នះក្រុមអង្គរថាយហ្គឺរ នៅលើកទឹកដីខេត្តសៀមរាបបានហើយបន្ទាប់ពីយកឈ្នះ ២-១ ក្នុងជំនួបបង្គ្រប់សប្ដាហ៍ទី៩ នៃលីគកំពូលកម្ពុជាឆ្នាំ២០២១ នៅកីឡដ្ឋាន SRU កាលពីល្ងាចថ្ងៃទី២០ ខែកក្កដាម្សិលមិញ។
ជំនួបដ៏តានតឹងរវាងក្រុមខ្លាំងទាំងពីរ វគ្គទី១ មិនមានគ្រាប់បាល់កើតឡើងនោះទេ ប៉ុន្ដែចូលវគ្គទី២ ការប្រកួតកាន់តែក្ដៅគគុក និងមានការប៉ះទង្គិចគ្នាយ៉ាងក្រាសក្រែល រហូតត្រូវបានអាជ្ញាកណ្ដាលលោក ឃិន ឧសីហា ចាយកាតលឿងអស់ចំនួន ៧ និងកាតក្រហមចំនួន ២ទៀតផង ។ គ្រាប់បាល់ដំបូងក្នុងការប្រកួតនេះផ្ដើមចេញពីការទាត់បាល់ពិន័យ ១១ម៉ែត្ររបស់ខ្សែប្រយុទ្ធណាហ្គាវើលដ៏ Marcio នៅនាទី៧៣ ខណៈ ៦នាទីបន្ទាប់អង្គរថាយហ្គឺរបានបាត់បង់ខ្សែការពារម្នាក់គឺកីឡាករ ស្រាំង ទិត្យឈី ក្រោយត្រូវបានអាជ្ញាកណ្ដាលពិន័យកាតក្រហម នៅនាទី៧៩។ ប៉ុន្ដែទោះសល់គ្នាត្រឹម ១០នាក់លើទីលាន ក៏ក្រុមម្ចាស់ផ្ទះបានព្យាយាមវាយបករហូតរកបានគ្រាប់តាមស្មើ ១-១ នៅនាទី៨៤ ក្រោយការទាត់បាល់ពីចម្ងាយយ៉ាងល្អរបស់កីឡាករ ថន សីហា។ ប៉ុន្ដែគួរឲ្យស្ដាយក្រោយរកបានគ្រាប់តាមស្មើ អង្គរថាយហ្គឺរបានបាត់បង់ខ្សែការពារម្នាក់ទៀតគឺកីឡាករ ឈង់ ប៊ុនណាត ដែលត្រូវបានអាជ្ញាកណ្ដាលពិន័យកាតលឿងលើកទី២ ស្មើនឹងកាតក្រហមនៅនាទី៨៧។
យ៉ាងណាមិញនៅសល់ពេលវេលា ៣នាទីចុងក្រោយបូកនាទីបន្ថែម ៦នាទីនេះ គេឃើញក្រុមទាំងពីរនៅតែព្យាយាមបង្កើតឱកាសរៀងៗខ្លួន ពិសេសអង្គរថាយហ្គឺរទោះសល់គ្នាត្រឹម ៩នាក់ក្ដី។ ប៉ុន្ដែមុនអាជ្ញាកណ្ដាលផ្លុំកញ្ចែបញ្ចប់ការប្រកួតកីឡាករ នុប តុលា បានស៊ុតបាល់ពីដំបូលទូក ១គ្រាប់ទៀត ដែលជួយឲ្យក្រុមណាហ្គាវើលដ៏យកឈ្នះក្រុមកំពូលតារាងអង្គរថាយហ្គឺរ ដោយលទ្ធផល ២-១ តែម្ដង។ នេះគឺជាលើកដំបូងហើយដែលក្រុមលោក មាស ចាន់ណា បានយកឈ្នះអង្គរថាយហ្គឺរនៅលើទឹកដីខេត្តសៀមរាប បន្ទាប់ពីពួកគេបានប្ដូរមូលដ្ឋានពីទីក្រុមភ្នំពេញទៅក្រុងសៀមរាបកាលពីឆ្នាំ២០១៧ ពោលបើគិតលទ្ធផលជួបគ្នា ៤លើកចុងក្រោយនៅខេត្តសៀមរាប ណាហ្គាវើលដ៏ធ្លាប់បរាជ័យក្រោមថ្វីជើងក្រុមរហស្សនាមខ្លាទឹកក្រូចនេះចំនួន ៣ដង និងស្មើម្ដងប៉ុណ្ណោះ។ តាមរយៈលទ្ធផលនេះដែរ បានធ្វើឲ្យក្រុមណាហ្គាវើលដ៏រំកិលមកឈរលេខរៀងទី៣ និងមាន ១៧ពិន្ទុជាមួយលទ្ធផល ៨ប្រកួតឈ្នះ ៥ ស្មើ ២ និងចាញ់ ១ ខណៈក្រុមអង្គរថាយហ្គឺរបន្ដឈរកំពូលតារាង និងមាន ១៩ពិន្ទុ តែពួកគេប្រកួតបាន ៩លើក ឈ្នះ ៦ ស្មើ ១ និងចាញ់ ២៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
