ស្ទឹងត្រែង៖ ឯកឧត្ដម ឃួង ស្រេង អភិបាលរាជធានីភ្នំពេញ និងលោកជំទាវ នាព្រឹកថ្ងៃទី០១ ខែ​មេសា ឆ្នាំ២០២៤ បានដឹកនាំប្រតិភូរដ្ឋបាលរាជធានីភ្នំពេញចុះសួរសុខទុក្ខ និងនាំយក​អំណោយ​​របស់​​សម្ដេចម​ហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ចែកជូនដល់កងទ័ពជួរមុខនៅបញ្ជាការដ្ឋាន កងពលធំអន្តរាគមន៍លេខ៣ កងពល​តូច​អន្ត​រាគមន៍លេខ៩ កងពលតូចអន្តរាគមន៍លេខ១២៨ និងកងនគរបាលជាតិ វរសេនាតូច​ការពារ​ព្រំដែន​លេខ៧៩៣ ស្ថិតនៅក្នុងភូមិសាស្ត្រខេត្តព្រះវិហារ និងភូមិសាស្ត្រខេត្តស្ទឹងត្រែង។ ពិធីសំណេះសំណាលនេះបានធ្វើឡើងនៅទីបញ្ជាការវរសេនាតូចអន្តរាគមន៍លេខ ២៨៣ កង​ពល​តូច​អន្តរាគមន៍លេខ ១២៨ យោធភូមិភាគទី១ ក្នុងស្រុកសៀមប៉ាង ខេត្តស្ទឹងត្រែង។

ឯកឧត្ដម ឃួង ស្រេង មានប្រសាសន៍ថា សម្រាប់រដ្ឋបាលរាជធានីភ្នំពេញ គិតមកដល់ពេលនេះ បាន​បង្កើត​អនុស្សារណៈស្តីពីការចងសម្ព័ន្ធមេត្រីជាមួយអង្គភាពជួរមុខចំនួន២ គឺកងពល​ធំ​អន្ត​រាគមន៍​លេខ​៣ ក្នុងខេត្តព្រះវិហារ និងកងពលតូចអន្តរាគមន៍លេខ១២៨ ចំណុះ​យោធ​ភូមិ​ភាគ​ទី១ ក្នុងខេត្តស្ទឹងត្រែង ព្រមទាំងបានបង្កលក្ខណៈ និងតម្រង់ទិសជូនរដ្ឋបាលខណ្ឌទាំង ១៤ មន្ទីរ​អង្គភាពជំនាញ និងវិស័យឯកជនក្នុងមូលដ្ឋានរាជធានីភ្នំពេញ ដើម្បី​ចុះ​អនុស្សារណៈ​ចង​សម្ព័ន្ធ​មេត្រីភាព ជាមួយបណ្តាអង្គភាពចំណុះថ្នាក់ក្រោម ដែលកាន់តែ​កៀក​ជិត​ជីវភាព​រស់​នៅ​របស់​កង​ទ័ព​ចំនួន៤អង្គភាពបន្ថែមទៀត។ តាមរយៈ​ចំណង​សម្ព័ន្ធ​មេត្រី​ភាពនេះ រដ្ឋបាលរាជធានី​ភ្នំពេញ ​និងរដ្ឋបាលខណ្ឌទាំង ១៤ តែងតែបានចងភ្ជាប់មនោសញ្ចេតនា ឧបត្ថម្ភគាំទ្រ និងចុះ​ជួប​សាក​សួរ​សុខទុក្ខ មានសកម្មភាពដូចភ្លៀងរលឹម ដែលយ៉ាងហោចណាស់ បានរៀប​ចំ​ព្រឹត្តិការណ៍​២​ដង​ក្នុង​មួយឆ្នាំ គឺក្នុងអំឡុងពេលបុណ្យភ្ជុំបិណ្ឌ និងក្នុងអំឡុងពេលបុណ្យចូលឆ្នាំប្រពៃណីខ្មែរ ដោយ​បាន​នាំយកនូវអំណោយជាគ្រឿងឧបភោគបរិភោគ និងសម្ភារៈប្រើប្រាស់ ព្រមទាំង​ថវិកា​ឧបត្ថម្ភ​មួយ​ចំនួន ជូនចំពោះកងកម្លាំងប្រដាប់អាវុធ និងក្រុមគ្រួសារ ដើម្បីចូលរួមចែករំលែក គាំទ្រ​អង្គភាពជួរមុខ និងសម្រាលការលំបាកក្នុងជីវភាពរស់នៅបានមួយកម្រិត ដែលនេះ គឺ​ជា​ផ្លែផ្កា​នៃ​ចំណងសម្ព័ន្ធមេត្រី រវាងអង្គភាពជួរមុខ និងអង្គភាពជួរក្រោយ ស្របតាម អនុសាសន៍​ដឹក​នាំ​ដ៏​ខ្ពង់​ខ្ពស់បំផុតរបស់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត នាយករដ្ឋមន្ត្រី​។

លោកឧត្តមសេនីយ៍ទោ មៀច សាមុត មេបញ្ជាការកងពលតូចអន្តរាគមន៍លេខ១២៨ បាន​មាន​ប្រសាសន៍​ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានយកចិត្តទុកដា​ក់​ក្នុង​ការ​ដោះ​ស្រាយ ​និងផ្គត់ផ្គង់គ្រប់បែបយ៉ាងដល់កងយោធពលខេមរភូមិន្ទ ដើម្បីពង្រឹងប្រៀបឈ្នះ បង្កើន​ធន​ធានមនុស្សក្នុងជួរកងទ័ព ពង្រឹងសមត្ថភាពជំនាញ និងកសាង​ពង្រឹង​អង្គភាព​ឱ្យ​បាន​រៀប​រយ បង្កលក្ខណៈឱ្យកងយោធពលខេមរភូមិន្ទ មានលទ្ធភាព​ក្នុង​ការ​បំពេញ​កិច្ច​ការពារ​បូរណ​ភាព​ទឹកដី និងសហការ ការពារថែរក្សា សន្តិភាព សន្តិសុខ ស្ថិរភាព សុវត្ថិភាពសង្គម។ ក្នុង​ពេល​នេះ​ដែរ​សម្តេច បានជួយឧបត្ថម្ភជា ថវិកា សម្ភារៈ គ្រឿងឧបភោគ បរិភោគ ប្រេងឥន្ទនៈ ដល់​កងទ័ព​កំពុង​ឈរជើងការពារបូរណភាពទឹកដីតាមខ្សែបន្ទាត់ព្រំដែនកម្ពុជា-ថៃ ទិសទី១ និងកម្ពុជា -ឡាវ ទិសអូរអាឡៃ-អូរតាង៉ាវ តាមរយៈសម្ព័ន្ធមេត្រីភាពរដ្ឋបាលរាជធានីភ្នំពេញ ដឹកនាំផ្ទាល់​ដោយ​ ឯកឧត្តម ឃួង ស្រេង អភិបាលរាជធានីភ្នំពេញ និងលោកជំទាវ សម្រាប់ប្រើប្រាស់ ដោះ​ស្រាយ​ក្នុង​ការកសាងអង្គភាព។

ឧត្តមសេនីយ៍ទោ មៀច សាមុត បន្តថា សម្រាប់កងពលតូចអន្តរាគមន៍លេខ១២៨ យោធ​ភូមិ​ភាគ​ទី១ នេះជាលើកទី១៣ហើយ ដែលសម្ព័ន្ធ​មេត្រី​ភាព​រដ្ឋបាល​រាជ​ធានី​ភ្នំពេញ​បាន​ចុះម​ក​សំណេះ​សំណាល​ សួរសុខទុក្ខ ដល់ នាយទាហាន នាយទាហានរង និងពលទាហាន។ ដោយឡែក​សម្រាប់​កង​ពលតូចអន្តរាគមន៍លេខ១២៨ យោធភូមិភាគទី១ បានអញ្ជើញមកចំនួន ៥​លើក​រួច​មក​ហើយ​ដែរ៕ អត្ថបទ ៖ ប្រាក់ វ៉ាន់ដា