មន្ទីរពេទ្យមហារីកបាងកក វ៉ាត់ថាណូសុត របស់ប្រទេសថៃ និង មេតគ្រីអេត ខូអិលធីឌី ជាការិយាល័យតំណាងមន្ទីរពេទ្យអន្តរជាតិនៅកម្ពុជា ក៏ដូចជាដៃគូរពាណិជ្ជកម្ម នៅថ្ងៃទី៣១ មីនា ឆ្នាំ២០២៤នេះ បានរៀបចំវេទិកាសុខភាព ស្តីអំពីការថែទាំអ្នកជំងឺមហារីកកម្រិតខ្ពស់ ដើម្បីលើកកម្ពស់ការយល់ដឹងពីជំងឺមហារីក និងផ្តល់កម្លាំងចិត្តដល់អ្នកជំងឺនៅកម្ពុជា ខណៈជំងឺមហារីក ជាឃាតករមួយក្នុងចំណោមឃាតកផ្សេងៗ ដែលសម្លាប់ប្រជាជនយ៉ាងច្រើនក្នុងពិភាពលោក។
លោកដុកទ័រ ធីរ៉ាវុទ្ធ ឃូហាប្រេម៉ា Thiravud Khuhaprema នាយកមន្ទីរពេទ្យ នៃមន្ទីរពេទ្យមហារីកបាងកក វ៉ាត់ថាណូសុត បានមានប្រសាសន៍ថា គិតត្រឹមឆ្នាំ២០២២ ដោយផ្អែកលើស្ថិតិមួយដែលបានបង្ហាញដោយអង្គការសុខភាពពិភពលោក (WHO) មហារីកថ្លើម សួត និងសុដន់ គឺជាជំងឺបានកើតឡើងទាំងបុរស និងស្រី្តចំពោះប្រជាជនកម្ពុជា។ គួរឱ្យចាប់អារម្មណ៍ ក្រៅពីមហារីកទាំងនេះ មហារីកពោះវៀនធំ ក៏ជាប់ចំណាត់ថ្នាក់កំពូលដែរ ដែលមានផលប៉ះពាល់ដល់ប្រជាជនទូទៅទាំង២ភេទ។
ជាមួយនេះ លោកដុកទ័រ បានចង្អុលបង្ហាញថា ទោះបីជាជំងឺមហារីកពោះវៀនធំ ត្រូវបានរកឃើញជាញឹកញាប់ចំពោះមនុស្សដែលមានអាយុលើសពី ៥០ឆ្នាំក៏ដោយ ក៏និន្នាការនៃជំងឺមហារីកពោះវៀនធំ ដែលត្រូវបានធ្វើរោគវិនិច្ឆ័យនៅវ័យក្មេងមានការកើនឡើង ដោយសារកត្តាទាក់ទងនឹងរបៀបរស់នៅ។ ក្រៅពីមនុស្សចាស់ អ្នកដែលមានហានិភ័យនៃជំងឺមហារីកពោះវៀនធំ គឺជាអ្នកដែលមានប្រវត្តិផ្ទាល់ខ្លួននៃដុំពកពោះវៀនធំ ជំងឺរលាកពោះវៀន និងប្រវត្តិគ្រួសារនៃជំងឺមហារីកពោះវៀន ព្រមទាំងអ្នកដែលមានទម្លាប់មិនល្អ ឧទាហរណ៍ដូចជាការផឹកស្រា ធាត់ និងជក់បារី។ ទោះបីជាការពិតដែលថាជំងឺមហារីកពោះវៀនធំជារឿយៗមិនមានរោគសញ្ញានៅដំណាក់កាលដំបូងក៏ដោយ សញ្ញាព្រមានទូទៅរួមមានការមិនស្រួលក្នុងពោះ ការហូរឈាមតាមរន្ធគូថ និងការផ្លាស់ប្តូរទម្លាប់ពោះវៀន។
លោកបានបញ្ជាក់ទៀតថា បច្ចុប្បន្ននេះ ភាពជឿនលឿនផ្នែកវេជ្ជសាស្ត្រផ្នែកមហារីកបានបង្កើនល្បឿននៃការផ្លាស់ប្តូរ ដោយអាចផ្តល់នូវឱកាសនៃការព្យាបាលកាន់តែជោគជ័យ តាមរយៈគ្រប់វិធីព្យាបាល រាប់ចាប់ពីការវះកាត់ ការព្យាបាលដោយវិទ្យុសកម្ម ការព្យាបាលដោយប្រើគីមី រហូតដល់ជម្រើសប្រកបដោយភាពច្នៃប្រឌិត ឧទាហរណ៍ការព្យាបាលដោយគោលដៅ និងការព្យាបាលដោយភាពស៊ាំ។ ទីតាំងសំរាប់ការព្យាបាលមាននៅទីស្នាក់ការកណ្តាលមន្ទីរពេទ្យបាងកក មន្ទីរពេទ្យមហារីកបាងកក វ៉ាត់ថាណូសុត គឺជាមន្ទីរពេទ្យផ្នែកជំងឺមហារីកឯកជនដំបូងគេក្នុងប្រទេសថៃ ដែលត្រូវបានបង្កើតឡើងក្នុងឆ្នាំ២០០៧។ គាំទ្រដោយការច្នៃប្រឌិតផ្នែកវេជ្ជសាស្រ្តចុងក្រោយបំផុត មន្ទីរពេទ្យផ្តល់ជូននូវការថែទាំមហារីកយ៉ាងទូលំទូលាយដែលធ្វើឡើងដោយអ្នកជំនាញផ្នែកជំងឺមហារីកដែលគ្របដណ្តប់លើគ្រប់ឯកទេស។ មិនត្រឹមតែបម្រើអោយអ្នកជំងឺក្នុងស្រុកទេ អ្នកជំងឺអន្តរជាតិភាគច្រើនរួមមាន អ្នកជំងឺកម្ពុជា មីយ៉ាន់ម៉ា ជប៉ុន អារ៉ាប់ និងបង់ក្លាដែស ក៏ដូចជាជនជាតិភាគខាងលិច ដូចជា សហរដ្ឋអាមេរិក ចក្រភពអង់គ្លេស និងអាល្លឺម៉ង់។ ជាពិសេសសម្រាប់អ្នកជំងឺកម្ពុជា មន្ទីរពេទ្យបាងកកផ្តល់ជូននូវសេវាអ្នកជំងឺ ៣៦០ដឺក្រេ រួមទាំងអ្នកបកប្រែជនជាតិដើម អ្នកសម្របសម្រួលក្នុងករណី គិលានុបដ្ឋាយិកាកម្ពុជា និងបញ្ជរសេវាវេជ្ជសាស្រ្ដកម្ពុជា ដើម្បីជួយសម្រួលគ្រប់ជំហាននៃការរៀបចំផ្នែកវេជ្ជសាស្ត្រ និងមិនមែនវេជ្ជសាស្ត្រ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
