ភ្នំពេញ ៖ អង្គភាពCMAC បានរៀបចំដំណើរទស្សនកិច្ចនៅកម្ពុជារយះ7ថ្ងៃជូនដល់គណៈប្រតិភូមកពីប្រទេសអ៊ុយ ក្រែនជាច្រើននាក់

ដើម្បីពង្រឹងកិច្ចសហប្រតិបត្តិការ និងសិក្សាស្វែងយល់បន្ថែមទៀតពីកិច្ចប្រតិបត្តិការបោស សម្អាតមីន និងសំណល់យុទ្ធភណ្ឌសង្គ្រាមរបស់អង្គភាព CMACនៅកម្ពុជា ខណះដែលប្រទេសអ៊ុយក្រែននេះកំពុងមានគ្រាប់យុទ្ធភណ្ឌសង្គ្រាមនោះ។

​នាថ្ងៃទី១ ខែមេសា ឆ្នំា២០២៤ នេះ នៅទីបញ្ជាការស៊ីម៉ាក់ភ្នំពេញ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់បានទទួលស្វាគមន៍បដិ សណ្ឋារកិច្ច និងពិភាក្សាការងារ ក្នុងដំណើរទស្សនកិច្ចផ្លូវការបស់គណៈប្រតិភូប្រទេសអ៊ុយក្រែនដឹកនាំដោយ ឯកឧត្តម Bogdan Drapiatyi អនុរដ្ឋមន្រ្តីក្រសួង មហាផ្ទៃ និងឯកឧត្តម Ihor Bezkaravainyi អនុរដ្ឋមន្រ្តីក្រសួងសេដ្ឋកិច្ចអ៊ុយក្រែន និង ក៏មានការអញ្ជើញចូលរួមពីឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា ឯកឧត្តម Oleksandr Gaman ឯកអគ្គរដ្ឋទូតអ៊ុយក្រែនប្រចាំនៅកម្ពុជា និង តំណាងអង្គភាពផ្តល់សេវា កម្មរដ្ឋក្នុងគ្រាអាសន្នសម្រាប់ប្រទេសអ៊ុយក្រែន ។

តាមរយៈនៃជំនួបនេះ ឯកឧត្តម ហេង រតនា ក៏បានជម្រាបជូនថ្នាក់ដឹកនាំរបស់ប្រទេសអ៊ុយក្រែន ពីប្រវត្តិសង្រ្គាមនៅកម្ពុជាដំណើរការនៃការកសាងសន្តិភាព ការ អភិវឌ្ឍន៍ប្រទេសឡើងវិញក្រោយសង្គ្រាមត្រូវបានបញ្ចប់ និងបានចែករំលែកបទពិសោធន៍ និងកិច្ចខិតខំប្រឹងប្រែងរបស់អង្គភាពស៊ីម៉ាក់លើការងារបោសសម្អាតមីននៅកម្ពុជា។

ជាការឆ្លើយតបថ្នាក់ដឹកនាំរបស់ប្រទេសអ៊ុយក្រែនបានថ្លែងអំណរគុណដល់រាជរដ្ឋាភិបាលជប៉ុន និង រាជរដ្ឋាភិ បាលកម្ពុជា ពិសេសអង្គភាពស៊ីម៉ាក់សម្រាប់ការសម្របសម្រួលជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) ដែលបានផ្តល់នូវការគាំទ្រដល់គណៈប្រតិភូអ៊ុយ ក្រែនបានមកធ្វើទស្សនកិច្ចស្វែងយល់ពីវីស័យបោស សម្អាតមីននៅកម្ពុជា។

ដំណើរទស្សនកិច្ចនេះគឺផ្អែកតាមការស្នើសុំពីភាគី JICAនិងដោយមានការឯកភាពដ៏ខ្ពង់ខ្ពស់ពីសម្ដេចធិបតី ហ៊ុនម៉ាណែត នាយករដ្ឋមន្រ្តីកម្ពុជា អង្គភាពCMAC បានរៀបចំដំណើរទស្សនកិច្ចនៅកម្ពុជាជូនគណៈប្រតិភូនៃប្រទេសអ៊ុយក្រែនចំនួន ៨នាក់មកពីក្រសួងមហាផ្ទៃ, ក្រសួងសេដ្ឋកិច្ច និងអង្គភាពផ្តល់សេវាកម្មរដ្ឋ ក្នុងគ្រា អាសន្នសម្រាប់ប្រទេសអ៊ុយក្រែន ចាប់ពីថ្ងៃទី៣១ ខែ មីនា ដល់ថ្ងៃទី៦ ខែ មេសា ឆ្នាំ២០២៤ ខាងមុខនេះ ដើម្បីពង្រឹងកិច្ចសហប្រតិបត្តិការ និងសិក្សាស្វែងយល់បន្ថែមទៀតពីកិច្ចប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាមរបស់អង្គភាព CMAC។

សូមរំលឹកថា អង្គភាពCMACបានទទួលការគាំទ្រយ៉ាងពេញទំហឹងនិងការអនុញ្ញាតពីប្រមុខរាជរដ្ឋាភិបាល កម្ពុជា បានផ្ដល់ការហ្វឹកហ្វឺនបច្ចេកវិទ្យាឧបករណ៍បោស សម្អាតមីនចំនួន០២លើក ដល់មន្រ្ដីជំនាញមកពីអង្គភាពផ្តល់សេវាកម្មរដ្ឋក្នុងគ្រាអាសន្នសម្រាប់ប្រទេសអ៊ុយក្រែន ដោយលើកទី១ ប្រព្រឹត្តទៅចាប់ពីថ្ងៃទី១៤ ដល់ថ្ងៃទី២១ ខែមករា ឆ្នាំ២០២៣ នៅកម្ពុជា និងលើកទី២ ក្រោមកិច្ចសហប្រតិបត្តិការជាមួយមូលនិធិសាមគ្គីភាពប៉ូឡូញ ចាប់ ពីថ្ងៃទី០៣ ដល់ថ្ងៃទី០៧ ខែ កក្កដា ឆ្នាំ ២០២៣ នៅប្រទេសប៉ូឡូញ ដោយទទួលបានលទ្ធផលប្រកបដោយជោគជ័យគួរជាទីមោទនៈ៕ អត្ថបទ ៖ ភារម្យ