សមាជិកសមាគមសហគ្រិនស្ត្រីកម្ពុជា នៅល្ងាចថ្ងៃទី ៣១ ខែមីនា ម្សិលមិញនេះ បាន​រៀបចំ​ការ​បោះឆ្នោ​ត​ជ្រើសតាំង សមាជិកក្រុមប្រឹក្សាភិបាលថ្មី ដើម្បីបន្តបេសកកម្មការងារក្នុងរយៈពេល ៣ឆ្នាំ​ខាងមុខទៀត។ ការបោះឆ្នោតនេះធ្វើឡើងក្រោមវត្តមាន លោកជំទាវ អ៊ឹង កន្ថាផាវី រដ្ឋមន្ត្រី​ក្រសួង​កិច្ចការនារី។

សមាគមសហគ្រិនស្ត្រីកម្ពុជា ជាសមាគមដែលប្រមូលផ្ដុំដោយស្ត្រីជាសហគ្រិនដ៏ធំនៅកម្ពុជា។ សមាជិក​នីមួយៗ នៅក្នុងសមាគមសហគ្រិនស្ត្រីកម្ពុជា សុទ្ធតែមានមុខជំនួញ ឬក្រុមហ៊ុន​នៅ​ក្នុងដៃ​។ ក្នុងឱកាសសន្និបាតប្រចាំឆ្នាំ ២០២៤ របស់ខ្លួន សមាគមក៏​បាន​រៀបចំ​ការ​បោះឆ្នោត​ជ្រើស​តាំង​ក្រុមប្រឹក្សាភិបាលអណត្តិទី ៥ ដើម្បីបន្តដឹកនាំបេសកកម្មការងារស្នូលរបស់សមាគម និង​ជំរុញការរីកចំរើនរបស់សមាជិក របស់ខ្លួនក្នុងរយៈពេល ៣ឆ្នាំ ទៅមុខផងដែរ។

ក្នុង​ការ​ចូលរួមជាអាធិបតីក្នុងពិធីនេះ លោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ក៏​បាន​អបអរ​សាទរ ដល់លោកស្រី ចាន់ ភារី ប្រធានសមាគមថ្មី នៃសមាគម​សហគ្រិន​ស្ត្រី​កម្ពុជា​ផង​ដែរ​។​ លោកជំទាវ បានចាត់ទុកថាសមាគមសហគ្រិនស្ត្រីកម្ពុជា ជាកូនដែលមានការរីកធំធាត់ ដើរ​បាន​វែង​ឆ្ងាយ និងភាពល្បីល្បាញទាំងថ្នាក់ជាតិ និងអន្តរជាតិ។ លោកជំទាវមើលឃើញថា សមាគម​សហគ្រិនស្ត្រីកម្ពុជា មានដំណើរការប្រកបដោយក្ដីរីកចំរើន និង​មាន​សក្ដា​នុពល​បន្ត​រីក​ចំរើន​ទៅ​មុខបន្ថែមទៀត។ លោកជំទាវ បានលើកទឹកចិត្តបន្ថែមថា គ្រប់វិស័យទាំងអស់ មិន​អាច​ខ្វះ​វត្ត​មានស្ត្រីបាននោះទេ។ ស្ត្រីនិងបុរសជាដៃគូសហការ ធ្វើការជាមួយគ្នា។

ពាក់ព័ន្ធ​នឹង​ សមាគមសហគ្រិនស្ត្រីកម្ពុជាផងដែរ គឺនៅសប្ដាហ៍ក្រោយ លោកជំទាវ​ក៏​នឹង​មាន​ជំនួប​ជាមួយ​អ្នកវិនិយោគជប៉ុនដែលបំណងចង់សហការជាមួយ សមាគមសហគ្រិនស្ត្រីកម្ពុជា។

សម្រាប់​លោកស្រី ចាន់ ភារី ដែលត្រូវបានបោះឆ្នោតជ្រើសរើសជា ប្រធាម​សមាគម​សហគ្រិន​ស្ត្រី​កម្ពុជា សម្រាប់ការដឹកនាំក្នុងអាណត្តិថ្មីមានរយៈពេល ៣ឆ្នាំទៅមុខនេះ ក៏បានលើក​ឡើង​ជា​ការ​ប្ដេជ្ញា​ដែរ​ថា ក្នុងនាមជាប្រធានសមាគមលោកស្រី នឹងបន្ត​អនុវត្ត​នូវ​ផែនការ​យុទ្ធសាស្ត្រ​ដែល​ជា​បេសកកម្ម​សំខាន់ ដោយធ្វើយ៉ាងណាពង្រឹងសាមគ្គីភាព ផលិតភាព និងប្រសិទ្ធភាព ក៏ដូចជា ភាព​ជា​អ្នកដឹកនាំរបស់សហគ្រិនស្ត្រី។ លោកស្រីលើកឡើងថា នឹងធ្វើឱ្យស្ត្រីមានសម្លេងរួមគ្នា ដើម្បី​ឆ្ពោះ​ទៅរកភាពជោគជ័យក្នុងការប្រកបរបរអាជីវកម្ម។

លើសពីនេះ គឺជំរុញសមត្ថភាពសមាជិកទាំងអស់ឱ្យស្របទៅតាមការការរីកចំរើននៃបច្ចេកវិទ្យា ពោល​គឺ​ប្រើ​ប្រាស់បច្ចេកវិទ្យាដើម្បីបម្រើជាអត្ថប្រយោជន៍ដល់មុខជំនួញរបស់ខ្លួន។ សមាគម​ក៏​នឹ​ង​ព្យាយាម​ពង្រឹងការធ្វើទំនាក់ទំនងទាំងឆាកជាតិ និងអន្តរជាតិផងដែរ៕ អត្ថបទ៖ គឹមហុក