ប្រធានាធិបតីកូរ៉េខាងត្បូង លោក យ៉ុន សុកយ៉ុល (Yoon Suk Yeol) បាននិយាយនៅថ្ងៃចន្ទ (០១ មេសា) នេះថា រដ្ឋាភិបាលរបស់លោក បើកចំហក្នុងការពិភាក្សាជាមួយវេជ្ជបណ្ឌិតដែលប្រឆាំងនឹងផែនការរបស់រដ្ឋាភិបាលក្នុងការបង្កើនចំនួននិស្សិតចូលរៀននៅសាលាពេទ្យ ក្នុងការជំរុញឱ្យបញ្ចប់ភាពជាប់គាំង ខណៈចោទក្រុមអ្នករិះគន់ថាមិនបានផ្ដល់ជម្រើសសមហេតុផលដើម្បីបន្ធូរបន្ថយបញ្ហាកង្វះវេជ្ជបណ្ឌិត។

នៅក្នុងសុន្ទរកថារយៈពេល ៥០ នាទីរបស់ខ្លួន លោក យ៉ុន បានបង្ហាញពីឆន្ទៈជាលើកដំបូងក្នុងការស្វែងរកការសម្របសម្រួលលើសំណើកំណែទម្រង់ផ្នែកវេជ្ជសាស្រ្តរបស់ខ្លួន បន្ទាប់ពីរដ្ឋាភិបាលបានអំពាវនាវឱ្យមានការពិភាក្សាជាមួយវេជ្ជបណ្ឌិតដែលធ្វើកូដកម្ម។

លោក យ៉ុន បានសូមអភ័យទោសចំពោះភាពរអាក់រអួលដែលបង្កឡើងដោយកូដកម្ម ដែលកំពុងបន្តដោយគ្រូពេទ្យហាត់ការ ប៉ុន្តែបានចោទប្រកាន់ផ្នែកវេជ្ជសាស្ត្រ ថាបានគិតតែផលប្រយោជន៍ផ្ទាល់ខ្លួនរបស់ពួកគេជាជាងបញ្ហាសុខភាពសាធារណៈ។

ជាង ៩០ ភាគរយនៃគ្រូពេទ្យហាត់ការចំនួន ១៣.០០០ នាក់របស់ប្រទេសនេះ បានចាប់ផ្តើមតវ៉ាចាប់តាំងពីថ្ងៃទី ២០ ខែកុម្ភៈ មក ដើម្បីតវ៉ាប្រឆាំងនឹងផែនការរបស់រដ្ឋាភិបាលក្នុងការជំរុញការចូលរៀននៅសាលាវេជ្ជសាស្ត្រចំនួន ២.០០០ នាក់ដែលចាប់ផ្តើមនៅឆ្នាំ ២០២៥ ពីចំនួន ៣.០០០ នាក់នៅពេលបច្ចុប្បន្ន។

ក្រុមអ្នកជំនាញផ្នែកវេជ្ជសាស្រ្ដមួយចំនួនបាននិយាយថា រដ្ឋបាលលោក យ៉ុន បានបរាជ័យក្នុងការពិគ្រោះជាមុន ហើយផែនការរបស់ខ្លួននឹងមិនគ្រប់គ្រាន់ដើម្បីជួសជុលស្ថានភាពបច្ចុប្បន្នទេ រួមទាំងប្រាក់កម្រៃដ៏ទាបសម្រាប់គ្រូពេទ្យហាត់ការ៕