ប្រមុខការទូតបារាំង បាននិយាយនៅថ្ងៃចន្ទនេះថា ទីក្រុងប៉ារីសរំពឹងថា ប្រទេសចិននឹងផ្ញើ «សារច្បាស់លាស់» ទៅកាន់ដៃគូជិតស្និទ្ធរបស់ខ្លួនគឺរុស្ស៊ីអំពីសង្គ្រាមរបស់ខ្លួននៅអ៊ុយក្រែន បន្ទាប់ពីកិច្ចប្រជុំជាមួយសមភាគីរបស់លោក នៅទីក្រុងប៉េកាំង។

ប្រទេសបារាំងនិងចិន បានស្វែងរកការពង្រឹងទំនាក់ទំនងក្នុងប៉ុន្មានឆ្នាំថ្មីៗនេះ ហើយក្នុងអំឡុងពេលកិច្ចប្រជុំនៅទីក្រុងប៉ារីស ក្នុងខែកុម្ភៈ  រដ្ឋមន្ត្រីការបរទេសចិន លោក វ៉ាង យី  (Wang Yi) បានប្រាប់លោកប្រធានាធិបតី អេម៉ានុយអែល ម៉ាក្រុង( Emmanuel Macron)ថា ទីក្រុងប៉េកាំង បានកោតសរសើរចំពោះជំហរ «ឯករាជ្យ»របស់ប្រទេសលោក។

ប៉ុន្តែទីក្រុងប៉ារីស ក៏បានព្យាយាមដាក់សម្ពាធលើទីក្រុងប៉េកាំងអំពីទំនាក់ទំនងជិតស្និទ្ធរបស់ខ្លួនជាមួយ    ទីក្រុងមូស្គូ ដែលកាន់តែមានភាពជិតស្និទ្ធ ចាប់តាំងពីការឈ្លានពានលើអ៊ុយក្រែនមក។

ខណៈពេលដែលប្រទេសចិននិយាយថា ខ្លួនជាភាគីអព្យាក្រឹតក្នុងជម្លោះអ៊ុយក្រែន ហើយត្រូវបានគេរិះគន់ចំពោះការបដិសេធមិនថ្កោលទោសទីក្រុងមូស្គូចំពោះការវាយលុករបស់ខ្លួនលើអ៊ុយក្រែន។

ផ្ទុយទៅវិញ ទីក្រុងប៉ារីស បានក្លាយជាអ្នកគាំទ្រដ៏រឹងមាំបំផុតរបស់ទីក្រុងគីវ ដោយលោកម៉ាក្រុង កាលពីខែកុម្ភៈ ថែមទាំងមិនច្រានចោលការដាក់ទ័ពនៅលើទឹកដីនៅអ៊ុយក្រែន។

ចំណែករដ្ឋមន្ត្រីការបរទេសបារំាងលោក Stephane Sejourne បាននិយាយនៅថ្ងៃចន្ទនេះថា ខ្លួនចង់ឲ្យ «ប្រទេសចិន ផ្ញើសារយ៉ាងច្បាស់ទៅកាន់រុស្ស៊ី»ជុំវិញសង្គ្រាមរបស់ខ្លួននៅអ៊ុយក្រែន។

លោកបានប្រាប់សន្និសីទសារព័ត៌មាននៅទីក្រុងប៉េកាំង ដោយនិយាយជាមួយសមភាគីចិនរបស់ខ្លួន គឺលោកវ៉ាង យីថា៖«យើងជឿជាក់ថា នឹងមិនមានសន្តិភាពយូរអង្វែងទេ ប្រសិនបើរុស្ស៊ី មិនមានការចរចាជាមួយអ៊ុយក្រែន»។