ទីភ្នាក់ងារសារព័ត៌មានរដ្ឋ Bakhtar បានរាយការណ៍នៅថ្ងៃចន្ទនេះថា កុមារចំនួន៩នាក់ បានបាត់បង់ជីវិត បន្ទាប់ពីគ្រាប់មិនទាន់ផ្ទុះដែលបានបន្សល់ទុកពីសង្គ្រាមកាលពីអតីតកាល បានផ្ទុះនៅក្នុងខេត្ត Ghazni ភាគខាងកើតប្រទេសអាហ្វហ្គានីស្ថាន។

លោក Mullah Hamidullah Nisar នាយក នាយកដ្ឋានព័ត៌មាន និងវប្បធម៌ខេត្ត Ghazni បាននិយាយ ឧបទ្ទវហេតុនេះ បានកើតឡើងនៅក្នុងតំបន់ Zadran ស្រុក Geero បន្ទាប់ពីកុមារដែលមានអាយុចន្លោះពី ៤ ទៅ ១០ ឆ្នាំ បានរកឃើញគ្រាប់មិនទាន់ផ្ទុះ កាលពីរសៀលថ្ងៃអាទិត្យ ហើយបានចាប់ផ្តើមលេងជាមួយគ្រាប់នោះ ប៉ុន្តែគ្រាប់បានផ្ទុះភ្លាមៗ បណ្តាលឲ្យកុមារទាំង ៩ នាក់ស្លាប់នៅនឹងកន្លែង។

ស្រដៀងគ្នានេះដែរ មានការផ្ទុះយុទ្ធភ័ណ្ឌមិនទាន់ផ្ទុះ បណ្តាលឲ្យកុមារបីនាក់បានស្លាប់ និងពីរនាក់ផ្សេងទៀតបានរងរបួសនៅក្នុងខេត្ត Helmand ភាគខាងត្បូង កាលពីថ្ងៃទី ២២ ខែមីនា។

យោងតាមសេចក្តីរាយការណ៍បានឲ្យដឹងថា ប្រទេសអាហ្វហ្គានីស្ថាន ដែលហែកហួរដោយសង្រ្គាម គឺជាប្រទេសមួយក្នុងចំណោមប្រទេសដែលមានគ្រាប់មីនស្អុយច្រើនបំផុតក្នុងពិភពលោក ខណៈគ្រាប់ និងគ្រាប់មីន មិនទាន់ផ្ទុះត្រូវបានបន្សល់ទុកពីសង្គ្រាម និងជម្លោះស៊ីវិល ក្នុងរយៈពេលជាងបួនទសវត្សរ៍កន្លងទៅនេះ។