របាយការណ៍មួយបានបង្ហាញថា កងម៉ារីនអាមេរិកកំពុងរៀនពីរបៀបប្រយុទ្ធជាមួយសត្រូវ ដូចជាប្រទេសចិនជាដើម នៅលើកោះដាច់ស្រយាល ដើម្បីឆ្លើយតបទៅនឹងការកើនឡើងភាពតានតឹង នៅក្នុងតំបន់ប៉ាស៊ីហ្វិក។ បើតាមសារព័ត៌មាន The Washington Post បានឲ្យដឹងថា កងទ័ពកំពុងហ្វឹកហាត់ ដើម្បីប្រយុទ្ធឆ្លងកាត់ស្ថានភាពលំបាក បន្ទាប់ពីមានការប្រយុទ្ធគ្នារយៈពេល ២០ឆ្នាំ លើដែនដី នៅតំបន់មជ្ឈិមបូព៌ា។

ឧត្តមនាវីឯកទ័ពជើងទឹកអាមេរិក នាពេលថ្មីៗនេះ បានពន្យល់ទៅកាន់គណៈកម្មាធិការសភាសេវាកម្មប្រដាប់អាវុធអាមេរិក អំពីការគំរាមកំហែងកាន់តែខ្លាំងឡើងពីប្រទេសចិន។ ឧត្តមនាវីឯកលោក John Aquilino កងទ័ពជើងទឹកសហរដ្ឋអាមេរិក បាននិយាយថា ការកសាងកម្លាំងយោធារបស់ប្រទេសនេះ គឺស្ថិតក្នុងកម្រិតមួយដែលមិនត្រូវបានឃើញ គិតចាប់តាំងពីសង្គ្រាមលោកលើកទី២ ហើយទីក្រុងប៉េកាំងកំពុងស្ថិតនៅលើផ្លូវដែលអាចលុកលុយកោះតៃវ៉ាន់ នៅឆ្នាំ២០២៧។

លោក Aquilino បានបន្តថា យោធាកំពុងបង្កើតអង្គភាពកងម៉ារីនថ្មី ដូចជាកងវរសេនាធំកងម៉ារីនទី៣ ដែលត្រូវបានរចនាឡើងឲ្យតូចជាង និងមានភាពរហ័សរហួនជាងមុន ហើយនឹងធ្វើការដើម្បីគាំទ្រដល់កម្លាំងរួមធំ។ អង្គភាពចល័តតូចៗជាច្រើនទៀតទាំងនេះ នឹងប្រមូលផ្តុំនូវភាពវៃឆ្លាត និងចែករំលែកបានយ៉ាងឆាប់រហ័ស ជាជាងអនុវត្តការវាយលុកតាមបែបប្រពៃណី។ ហើយបើតាមសារព័ត៌មាន The Washington Post បានឲ្យដឹងថា ពួកគេក៏នឹងអាចធ្វើការវាយប្រហារយ៉ាងជាក់លាក់ នៅពេលចាំបាច់ ដូចជាបាញ់ពន្លិចនាវា ដោយមីស៊ីលរយៈចម្ងាយមធ្យម។

ជាមួយគ្នានេះ សារព័ត៌មាន The Washington Post បានកត់សម្គាល់ថា អ្នកជំនាញមន្ទីរបញ្ជកោណគិតថា ផ្កាយរណបរបស់សហរដ្ឋអាមេរិក នឹងត្រូវបានធ្វើឲ្យស្ទះដំណើរការ ឬបំផ្លាញដោយប្រទេសចិន នៅក្នុងព្រឹត្តិការណ៍នៃសង្រ្គាមដែលអាចនឹងកើតមាន។ កងម៉ារីនថ្មីត្រូវបានគេរំពឹងថា នឹងដើរតួនាទីយ៉ាងសំខាន់ក្នុងការធ្វើប្រតិបត្តិការរួមគ្នាធំជាងនេះ ក្នុងគោលបំណងប្រឆាំងនឹងការលុកលុយរបស់ចិន នៅក្នុងតំបន់ឆ្ពោះទៅរកប្រទេសនានា ដូចជាកោះតៃវ៉ាន់ ប្រទេសជប៉ុន និងប្រទេសហ្វីលីពីនជាដើម៕