ស៊ីហ្គេម៖ អ្នកកាសែតរាប់រយនាក់បានទៅដល់ទីក្រុងតូក្យូ សម្រាប់ព្រឹត្តិការណ៍អូឡាំពិកដែលនឹងចាប់ផ្តើមនៅថ្ងៃសុក្រនេះ។ ប៉ុន្តែយ៉ាងហោចណាស់រយៈពេល ១៤ថ្ងៃនៃការស្នាក់នៅ ពួកគេនឹងត្រូវអនុវត្តតាមវិធានការរឹតបន្តឹងដ៏តឹងរ៉ឹង ក្នុងការបង្ការការរីករាលដាលឆ្លងនៃមេរោគ Covid-19 ដែលមានទាំងការកំណត់ការធ្វើដំណើររបស់ពួកគេ ត្រឹមពីកន្លែងស្នាក់នៅទៅកាន់ទីតាំងប្រកួតប៉ុណ្ណោះ រួមទាំងមានការធ្វើតេស្តប្រចាំថ្ងៃ និងការចែករំលែកទីតាំងទូរស័ព្ទ។
បន្ថែមពីលើនេះ ការមិនអនុញ្ញាតឱ្យមានអ្នកគាំទ្រនៅក្នុងការប្រកួត បានធ្វើឱ្យបរិយាកាសនៃព្រឹត្តិការណ៍មានលក្ខណៈធម្មតា ហើយកាន់តែលំបាកសំរាប់អ្នកសារព័ត៌មានក្នុងការផលិតរឿងនានា ពាក់ព័ន្ធនឹងព្រឹត្តិការណ៍ក្រៅពីរឿង Covid-19 និងកីឡា។ រឿងដែលចាំបាច់មួយទៀតនោះគឺគ្រប់គ្នាត្រូវតែធ្វើតេស្ត និងបញ្ជាក់ថា គ្មានកូវីដ-១៩ មុននឹងឈានជើងចូលទីក្រុងតូក្យូបាន។ អ្នកចូលរួមកីឡាអូឡាំពិក រួមទាំងអ្នកសារព័ត៌មានតម្រូវឱ្យទាញយកកម្មវិធី ត្រួតពិនិត្យតាមអ៊ិនធឺរណែត និងរបាយការណ៍សុខភាព (OCHA) ដាក់លើស្មាតហ្វូនរបស់ពួកគេដើម្បីបញ្ចូលស្ថានភាពសុខភាពប្រចាំថ្ងៃ។ ឧបករណ៍តេស្តរហ័សត្រូវបានផ្តល់ជូន ហើយអ្នកចូលរួមទាំងអស់ត្រូវធ្វើតេស្តរយៈពេល ៣ថ្ងៃដំបូងហើយបន្ទាប់មកក្នុងរយៈពេល ៤ថ្ងៃម្តងរហូតដល់ចប់ការស្នាក់នៅ។ ការរឹតត្បិតនេះក៏រួមបញ្ចូលទាំងការហាមឃាត់ ការប្រើប្រាស់មធ្យោបាយធ្វើដំណើរសាធារណៈទៅភោជនីយដ្ឋាន ឬកន្លែងទេសចរណ៍ ឬសូម្បីតែធ្វើដំណើរដោយថ្មើរជើងក្នុងរយៈពេល ១៤ថ្ងៃដំបូងនៅក្នុងប្រទេស។
ចំណែកអត្តពលិកនឹងត្រូវបានធ្វើតេស្តជារៀងរាល់ថ្ងៃ ហើយពួកគេក៏នឹងត្រូវនៅក្នុងភូមិកីឡាតែមួយមុខគត់ បន្ទាប់ពីការហ្វឹកហាត់ក៏ដូចជាមុន និងក្រោយចូលរួមប្រកួត។ កន្លងមកមានការប្រឆាំងជាប្រចាំពីសាធារណៈជនជប៉ុន មិនចង់ឱ្យមានការរៀបចំព្រឹត្តិការណ៍អូឡាំពិក ក្នុងកំឡុងពេលមានរោគរាតត្បាតដោយមានការភ័យខ្លាចថា វាអាចនឹងក្លាយជាព្រឹត្តិការណ៍ដែលបាចសាចការរីករាលដាលកាន់តែខ្លាំង និងបាចសាចដល់ប្រជាជនជប៉ុន។ រដ្ឋាភិបាលក្រុងតូក្យូបានរាយការណ៍ករណីឆ្លងថ្មីចំនួន ១.០០៨ករណីកាលពីថ្ងៃអាទិត្យដែលជាថ្ងៃទី២៩ ជាប់គ្នា ដែលករណីនេះខ្ពស់ជាង ៧ថ្ងៃមុន ហើយវាក៏ជាថ្ងៃទី៥ ជាប់គ្នាដែលមានជាង ១.០០០ករណី។ ពិធីបើកផ្លូវការនៃព្រឹត្តិការណ៍អូឡាំពិក នឹងនៅក្រោមស្ថានភាពអាសន្ននៅទីក្រុងតូក្យូ និងខេត្តជិតខាងចំនួន ៣៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
