ការិយាល័យប្រព័ន្ធផ្សព្វផ្សាយរបស់រដ្ឋាភិបាលតំបន់ហ្កាហ្សា ដែលគ្រប់គ្រងដោយក្រុមហាម៉ាស បាននិយាយកាលពីយប់ថ្ងៃចន្ទ (០១ មេសា) ថា យ៉ាងហោចណាស់បុគ្គលិក ៥ នាក់មកពីអង្គការមិនមែនរដ្ឋាភិបាលឈ្មោះថា ផ្ទះបាយកណ្តាលរបស់ពិភពលោក (WCK) ដែលរួមមានជនបរទេសជាច្រើននាក់ ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែល លើតំបន់ហ្កាហ្សា។

អ្នកនាំពាក្យការិយាល័យប្រព័ន្ធផ្សព្វផ្សាយបាននិយាយថា អ្នកដែលស្លាប់ក្នុងឧបទ្ទវហេតុនៅកណ្តាលក្រុង ដឺ អាល់បាឡាស (Deir al-Balah) របស់ហ្កាហ្សានេះ រួមមានពលរដ្ឋប៉ូឡូញ អូស្ត្រាលី និងចក្រភពអង់គ្លេស ព្រមទាំងជនជាតិប៉ាឡេស្ទីនម្នាក់។

ទីភ្នាក់ងារជំនួយ WCK បានបង្ហោះនៅលើបណ្ដាញសង្គម X កាលពីថ្ងៃចន្ទថា «យើងដឹងពីរបាយការណ៍ដែលថាសមាជិកនៃក្រុម WCK ត្រូវបានសម្លាប់នៅក្នុងការវាយប្រហាររបស់កងកម្លាំងការពារអ៊ីស្រាអែល IDF ខណៈកំពុងធ្វើការដើម្បីជួយដល់កិច្ចខិតខំប្រឹងប្រែងផ្តល់អាហារមនុស្សធម៌នៅក្នុងតំបន់ហ្កាហ្សា។ នេះគឺជាសោកនាដកម្មមួយ ហើយបុគ្គលិកជំនួយមនុស្សធម៌ និងជនស៊ីវិលមិនគួរជាគោលដៅវាយប្រហារនោះទេ»។

ដោយធ្វើការអត្ថាធិប្បាយលើរបាយការណ៍នេះ យោធាអ៊ីស្រាអែលបាននិយាយថា ខ្លួនបានកំពុងធ្វើការត្រួតពិនិត្យយ៉ាងហ្មត់ចត់នៅកម្រិតខ្ពស់បំផុត ដើម្បីស្វែងយល់ពីស្ថានភាពនៃឧប្បត្តិហេតុនេះ៕