ខេត្តពោធិ៍សាត់៖ ក្រុមការងារគណបក្សប្រជាជនកម្ពុជាចុះជួយមូលដ្ឋានឃុំអូរតាប៉ោង ស្រុក​បាកាន បានរៀបចំធ្វើពិធីបុណ្យកតញ្ញូរួមគ្នា ជូនដល់លោកយាយលោកតា ចាស់ព្រឹទ្ធីចារ្យ មាន​អាយុ​ចាប់​ពី៧០ឆ្នាំឡើងប្រមាណ៧៥០នាក់ ។ ពិធីបុណ្យនេះត្រូវបានរៀបចំធ្វើនៅក្នុងបរិវេណ វត្ត​ស្រះម្កាក់ ស្ថិតក្នុងឃុំអូរតាប៉ោង ស្រុកបាកាន ក្រោមអធិបតីភាព ឯកឧត្តម ទី នរិន្ទ ប្រធាន​ក្រុម​ការងារចុះជួយមូលដ្ឋានស្រុកបាកាន និងដោយ​មាន​ការ​ចូល​រួ​ម​ពី​កូន​ចៅ​សាច់​ញាតិ​អម​ដំណើរ​លោកយាយលោកតាចាស់ព្រឹទ្ធីចារ្យ និងសមាជិកក្រុមប្រឹក្សាឃុំ អាជ្ញាធរភូមិ-ឃុំ សរុប​អ្នក​ចូលរួម​ទាំងអស់ប្រមាណជិត១៥០០នាក់ ។

ឯកឧត្ដម ជៀប សួរ ប្រធានក្រុមការងារចុះជួយឃុំអូរតាប៉ោង បានឲ្យដឹងថាលោកយាយលោកតា​ចាស់​ព្រឹទ្ធាចារ្យ​មានអាយុចាប់ពី៧០ឆ្នាំឡើង ដែលបានអញ្ជើញចូលរួមក្នុងពិធីបុណ្យនេះ គឺមក​ពី​តាម​បណ្តា​ភូមិទាំង១៨ក្នុងឃុំអូរតាប៉ោង ហើយពិធីបុណ្យនេះត្រូវបានប្រារ​ព្ធ​ឡើងស្របតាមបែប​បទ​ព្រះពុទ្ធសាសនា និងប្រពៃណីខ្មែរ ដោយមានការនិមន្តព្រះសង្ឃធ្វើកិច្ចកតញ្ញូ កត្តវេទី រវាង​កូន​ចៅ និងលោកយាយលោកតាចាស់ព្រឹទ្ធីចារ្យ ហើយព្រះសង្ឃធ្វើពិធីប្រោះព្រំ។ ក្នុងនោះដែរ​ក្រុម​ការងារ​ចុះ​ជួយមូលដ្ឋានឃុំអូរតាប៉ោង ក៏បានរៀបចំជាថវិកា និងសម្ភារៈរួមមាន ខោអាវ​សម្រាប់​មនុស្ស​ចាស់ ស្បែកជើង នំបង្អែម ទឹកក្រូច ទឹកសុទ្ធ ព្រមទាំងបានផ្តិតរូបថតដាក់ស៊ុម ដើម្បី​ឲ្យ​កូន​ចៅ ជូនដល់លោកយាយលោកតាចាស់ព្រឹទ្ធីចារ្យទាំង៧៥០នាក់ផងដែរ ។

ក្នុងឱកាសនោះ ឯកឧត្តម ទី នរិន្ទ មានប្រសាសន៍លើកឡើងថា ការរៀបចំពិធី​បុណ្យ​ កត្តញ្ញុរួមគ្នា ជូនដល់លោកយាយលោកតា ចាស់ព្រឹទ្ធីចារ្យ ដែលមានអាយុចាប់ពី៧០ឆ្នាំឡើងក្នុងពេលនេះគឺ ក្រោម​គំនិតផ្តួចផ្តើមរបស់ឯកឧត្តម កែវ រតនៈ ប្រធានក្រុមការងារចុះជួយមូលដ្ឋានខេត្តពោធិ៍សាត់ ។ ក្នុងគោលបំណង គឺដើម្បីជាការដឹងគុណចំពោះចាស់ព្រឹទ្ធាចារ្យ ដែលជាធន​ធាន​មនុស្ស​ដ៏​មាន​តម្លៃ​ ដោយបានផ្តល់ដំបូន្មានមានល្អៗ និងសំបូរទៅ​ដោយ​បទ​ពិសោធន៍​ព្រម​ទាំង​ស្នាដៃរា​ប់​មិន​អស់​ក្នុង​សង្គម ដល់កូនចៅគ្រប់ជំនាន់ ជាពិសេសកម្មវិធីបុណ្យនេះ ជាសារក្រើន​រំលឹក​ដល់​កូន​ចៅ​ និង​យុវជន​ជំនាន់ក្រោយឲ្យយល់ច្បាស់ពីគុណមាតាបិតា កុំឲ្យភ្លើតភ្លើន​រមិល​គុណ​មាតា​បិតា​ដែល​ជា​ព្រះរស់ ហើយជាការ​ចូលរួម​ថែ​រក្សា​ការពារ​នូវ​តម្លៃ​ប្រពៃណី​វប្បធម៌​ខ្មែរ​ពី​បុរាណ​ដល់កូ​ន​ចៅ​ជំនាន់​ក្រោយៗ ជាពិសេសគឺកំឡុងពេលរដូវចូលឆ្នាំខ្មែរ ។ ឯកឧត្តម ទី នរិន្ទ បានបន្តថា​ប្រសិន​បើ​បងប្អូន​ប្រជាព​លរដ្ឋក្នុងឃុំអូរតាប៉ោង មានការគ្រាំទ្រក្រុមការងារ​នឹង​រៀប​ចំ​ពិធី​បុណ្យ​នេះ​នៅ​ឆ្នាំ​ក្រោយ​ៗទៀត៕ អត្ថបទ និង រូបភាព ៖ ភិរុណ ពៅ