មណ្ឌលគិរី៖ កូនដំរីញីមួយក្បាល ឈ្មោះជីពេជ្រ បានស្លាប់ដោយ​មិនដឹងមូល​ហេតុ​កាល​ពីម៉ោង​ប្រហែល១០​យប់ថ្ងៃទី៣១ ខែមីនា ឆ្នាំ២០២៤ នៅក្នុងអូរពងប៉ះ ចំណុចអន្លង់កងត្រូម ចន្លោះ​ភូមិ​ពូត្រុំ និងស្រែអ៊ី សង្កាត់រមនា ក្រុងសែនមនោរម្យ ខេត្តមណ្ឌលគិរី។

នាយកអង្គការELIE លោក ឃុន ឌីយ៉ូន បានប្រាប់នៅល្ងាចថ្ងៃទី០១មេសានេះថា សត្វដំរីឈ្មោះ ជីពេជ្រ ភេទញី អាយុ ២ឆ្នាំ និង២ថ្ងៃ ពុំទាន់ដឹងពីមូលហេតុនៃការស្លាប់ ហើយ​ នៅថ្ងៃទី២មេសា​នេះ​ក្រុម​បសុពេទ្យមកពីសួនសត្វភ្នំតាម៉ៅ នឹងពិនិត្យរកមូលហេតុនៃការស្លាប់។ បច្ចុប្បន្ន សពដំរីត្រូវបានដឹកមកដល់គម្រោង EVP របស់អង្គការ ELIE នៅក្នុងភូមិពូត្រុំ ដែល​ហៅថាជ្រលងភ្នំដំរីរួចហើយ ។ ក្រោយគ្រូពេទ្យពិនិត្យសាកសពរួច អង្គការELIE នឹង​ធ្វើ​ការ​បញ្ចុះ​សព​កូនសត្វដំរីជីពេជ្រតាមប្រពៃណី ។